Ka NPP ka la pynkhreh ban iakhun ilekshon ha GHADC:Rakkam

U Nongialam ka seng saiñ pyrthei National People’s Party (NPP) u Rakkam A Sangma, hynne ka sngi ula ong ba ka NPP ka la sdang ban pynkhreh ia ka elekshon MDC sha ka Garo Hills Autonomous District Council (GHADC) bad u kyrmen skhem ba ka seng kan jop bun ngut ha kane ka elekshon ban wan.

Haba iakren bad ki nongthoh khubor hynne ka sngi u Rakkam ula ong “Ngi la pynkhreh ban iakhun ia ka elekshon MDC jongka GHADC bad ngi sngewskhem ba ki kyrtong ka NPP kin jop bun ngut ban ioh ialam marwei ia ka Executive Committee”.

U Rakkam uba long ruh u Myntri ka Sorkar Jylla ula ong ba ka seng kan mih ban iakhun marwei ia ka elekshon MDC bad kan ym iatehlok bad kino kino ki seng saiñ pyrthei bad ka NPP kan trei shitom ban pynthikna ba kan ioh ia ka jingjop kaba bun paid tam hapoh jong ka GHADC.

Ula ong ka seng ka la trei shitom bad ka la pyniaid shaid shaid ia ki jingpynkhreh na ka bynta katei ka elekshon bad kan ym khein sting iano iano ha kane ka jingiakhun ia ka elekshon.

Ula bynrap ka NPP kum ka seng kaba ialam ia ka sorkar jylla kan ialeh ha kaban pynleit jingmut ban ialap shaphang ki jingjop jong ka seng ha ki kam bapher bapher khamtam haba ka sorkar MDA hapoh ka jingialam u Myntri Rangbah Conrad K Sangma ka la lah ban wanrah ia ka jingkylla bapher bapher, la ka long ia ka jingtei ia ki surok, ka pule puthi, ki kam ialehkai, ka kam rep kam riang bad kiwei kiwei. Hynrei wat la katta ruh ki dang don bun pat ki kam kiba dang donkam ban trei ban pynjanai shuh shuh ia ki na ka bynta ka jingmyntoi jong ki paidbah ka jylla.

“Peit ia ki surok kiba itynnad, ki madan ialehkai, ki college ba bun, ki iingskul ba bun. Ngi la pynkha ia baroh ki lain pule ha baroh ki skul Sorkar. Ngi la kyntiew kyrdan bad ai ia ki building ne jingtei kiba bha ia ki college, hynrei ngi ieh ha u paidbah ban bishar ia ka jingtreikam jong ka Sorkar MDA” la ong u Rakkam.

Une u nongialam ula iathuh ruh ba ki la don palat spah ngut ki kyrtong kiba la pynpaw ia ka jingthrang ka jong ki ban iakhun ia ka elekshon MDC na ka seng NPP bad ki la don ruh bun ngut ki kyrtong kiba ia knieh tiket ha ki constituency bapher bapher jong ka rilum Garo.