Ka “One Nation One Election” ka lah ban wanrah jingma ha ka synshar khadar

Ka Don Bosco College Byndihati, East Jaiñtia Hills District ryngkat ka jingiatreilang ka Ministry of Youths Affairs & Sports Regional Directorate of NSS, Guwahati ka sorkar India ha ka 20/03/25 ka la pynlong ia ka Viksit Bharat Youth Parliament 2025 kum ka rynsan iathir halor ka phang ‘One Nation One Election’, kaba dei halor ka Viksit Bharat.

Ha kane ka rynsan iathir la wan shim bynta da ki samla pule ka Rilum Jaiñtia kynthup na ka Kiang Nangbah Govt College Jowai, ka Thomas Jones Synod College Jowai, ka Khadar Dolloi Law College Jowai, ka Jaiñtia Eastern College Khliehriat bad ka Don Bosco College Byndihati.

Kiba shim bynta ban ai jingkyrshan ia kane ka mat ki la ong, ban pynlong ha kajuh ka por ia baroh ki election na ka bynta ka election Parliament, State Assembly, Local body ka iarap ban ioh ia ka jingshakri ha ka roi ka par, ki jingtei jingshna, ne ki aiñ ki kanun bad kiwei. Katba ki kynhun ba pyrshah pat ia kane ka phang ki ong, ka lah ban wanrah jingma ha ka kam synshar khadar da kaba pyni ruh ia ki nongrim.

Ha kane ka jingiathir ia ka kyrdan banyngkong la ioh ka Kalung Angel, ba ar ka Amy Lapasam, ba lai u Sanjay Shreshtha, ba saw ka Febilliza Dkhar, ba san ka Vida Pala kiba dei na ka Don Bosco College Byndihati.

Ha ka kyrdan ba hynriew la ioh ka Riwanka Suchiang, ba hynñiew ka Iaplilang Nongrang, ba phra ka Beautiful Dhar kiba dei na ka Kiang Nangbah Govt College Jowai.

Ha ka kyrdan ba khyndai la ioh u Lambokstar Jyrwa na ka Don Bosco College Byndihati, Ha ka kyrdan ba 10 la ioh u Trebokmi Talang ba na Khadar Dolloi Law College Jowai.

Kine kiba jop kin ioh ban leit mihkhmat ha ka state level.

Shwa kane la don ka jingialang lyngkot bala donlang u Fr.Daniel Dabitlang Cajee Principal, Don Bosco College Byndihati, u Dr Seven Dar Dkhar NSS District Nodal Officer uba la kren lamkhmat halor ka Viksit Bharat Youth Parliament, u Justin Dkhar Ex MLA Khliehriat, u Wailad Dameshwa Siangshai MDC Musniang Rngad,ki nonghikai naki college ba shim bynta bad kiwei.