Ka Penshon Adalat ka pyndep 85 ki mukotduma ba sah teng bad buh ki lad jingiada

U Principal Accountant General (A&E), Meghalaya, Shillong ryngkat ka tnad Finance (Pension Cell) jong ka Sorkar Meghalaya ki la pynlong ia ka Adalat Pension ha ka 19 tarik u Jylliew, 2025, ha Basic Training Centre, Malki, Shillong. Kane ka sienjam ka thmu ban pynbeit ia ki jingeh ba la slem bha ba ia dei bad ka baibam tymmen jong ki nongtrei sorkar ba la shongthait ha ka rukom ba shai ha por ba biang. Ha kane ka Adalat la peit haduh 85 tylli ki mukotduma bai bam tymmen ba la sahkut slem bah ban bishar bniah. Ha kane ka sngi la wan iashim bynta da ki Drawing and Disbursing Officer (DDO), ki nongïoh bai bam tymmen, bad ki ophisar ba dei peit ïa ka jingpyntreikam ïa ka bai bam tymmen. La bishar bniah ia kawei pa kawei ka case bad la pynshisha ia ki kot ki sla ha ka jingdonlang ki briew kiba don bynta ha kane ka kam. Ka Pension Adalat ka long kum ka rynsan ban ïakren laitluid bad ban pynbeit mardor ïa ki katto katne ki mukotduma ba eh. La ai jingmut sha ki heh jong ka tnad kam pla tyngka bad ki DDO halor ka jingpynkylla bad pyntreikam hok ia ki kyndon ba ia dei bad ki Pension Rules. Katto katne ki mukotduma ba la sah khlem lah ban pynbeit la slem mynta, ki la pynbeit bha ha ka por ba pynlong ia kane ka jingialang.

Hynrei la lap ruh ba ha ki katto katne ki khep, wat hapdeng ka jingbuddienbunsien da ka tnad kam pla tyngka (Pension Cell) bad ki DDO bapher bapher, ym shym la lah ban lap ïa u briew ba dei ban ioh ia ka bai bam tymmen. Ia kine ki case dei ban khein kum kiba la pyndep, katkum ka jingmynjur jong ka tnad kam pla tyngka.Ka mat ba kongsan kaba la pynpaw ha ka por jong ka Adalat ka long ka jingpynslem ban pynbeit ia ka bai bam tymmen namar ka jingbym aiti ia ki phom thep kyrteng da ki nongtrei ha ka por ba ki dang don ha ka jingshakri. Ka jingbymdon jong kine ki kot ki sla kiba kongsan ka la wanrah ia ki jingeh kiba lah ban kiar ha kaba pyntreikam ia ki jingdawa bai bam tymmen. U Principal Accountant General ula ban jur halor ka jingdonkam kyrkieh ban shim ia ki lad jingiada bad ula ai jingmut ba ka tnad pla tyngka kan pynmih ia ki jingbthah sha baroh ki DDO ban pynthikna ba dei ban lum ia ki nomination form na baroh ki nongtrei sorkar shwa ba kin shongthait.

Baroh kiba ia don bynta ki la iaroh ia kane ka jingialang bad ki la ong ba ka long kum ka sienjam kaba bha ban pynbeit ia ki jingeh bad ban kyntiew ia ka jingseisoh bad ka rukom treikam kaba ia dei bad ka kam bai bam tymmen ha ka jylla.