Ka PHC Sohryngkham ka dang treikam kum ka Sub-center, ong u bah Kharpran

U MLA ka Mawryngkneng konstitwensi u bah Heavystone Kharpran u la leit ban kynduh ia ka myntri ka koit ka khiah ka kong Ampareen Lyngdoh ha ophis treikam jong ka, ban weng ïa ki jingeh kiba kyrkieh ha kaba ïadei bad ka tnad ka koit ka khiah ha ka konstitwensi. Ha kane ka jingïakynduh, u MLA ula pynpaw ïa ka jinglong jingman ha Sohryngkham Sub-Center, kaba dang shen la kyntiew kyrdan sha ka Public Health Clinic (PHC) hynrei haduh mynta dang don tang u Maw Nongrim bad ka dang treikam hi kum ka Sub-center.

U MLA ula pynpaw ïa ka jingsngewkhia halor ka jingbym don ki lad ki lynti bad ki jaka sumar ban pynbiang ïa ki jingshakri ha ka koit ka khiah. Halor kane, ka Myntri Ampareen Lyngdoh ka la pynthikna ïa u MLA ba ka don kajingangnud ban weng ïa kine ki jingeh. Ka la kular ban pynlong ia ka jingpeit bniah ia ka jaka jong ka Sohryngkham PHC, ryngkat bad ar tylli kiwei pat ki jaka sumar ha ka konstitwensi, ha ka 9 tarik u bnai Risaw, 2024.

Ka Myntri bad u MLA kin iatreilang ban bishar bniah ia ki jingtei, ki nongtrei, bad ki jingdonkam jong ki tiar jong kine ki jaka sumar, ryngkat bad ka thong ban pynbha ia ka jingai jingsumar ia ki paidbah ka Mawryngkneng. U MLA u la pynpaw ka jingkyrmen hadien ka jingïalang, da kaba ong ba ka jingleit jurip ïa ka jaka kan long ka sienjam kaba kongsan ban pynthikna ïa ka jingshakri kaba kham bha na ka bynta ka koit ka khiah na ka bynta ka thaiñ.