Ka rai pynkynriah ïa ki nongdie madan, ka jingbthah na ka Ïing kashari

Ka Sorkar Jylla ha ka wat banyngkong kan pynkynriah ia ki nongdie madan na kylleng ka Sor Shillong sha kiwei ki jaka ba la ithuh kyrpang bad Civil Hospital. Ia ka rai ban pynkynriah ia ki nongdie madan ka long katkum ka jingbthah jong ka Iingkashari Meghalaya High Court, ia ka Tnad Urban Affairs ban thung ia ka Committee ba kynthup ia ki bor Sorkar ban ithuh ia ki jaka shong dukan madan ba kyrpang na ka bynta ki nongdie madan. Ha shuwa ban shim ia ka rai, ka tnad ka la pynlong ia ka Survey ha ki 22 tyli ki jaka hapdeng u Nohprah 2022 bad Kyllalyngkot, 2024 ha ka thain Khyndai Lad, Assembly, Barik, Dhankheti, Firebridge, GS Road, Governor, Iew Mawlong, Laban, Jail Road, Lachumiere, Laitumkhrah Firebrigade, Lumshatsngi, Malki, Motphran, Polo, Qualapatty, Quintton Road, Red Cross, Umsohsun, Wahthapbru, bad Wards Lake. Ïa kane ka rai jong ka Sorkar la pyntip lyngba ka kyrwoh ba la phah da u Additional Secretary ka Tnad Urban Affairs kaba ong, “La rai ha ka wat nyngkong ban kynriah ia ki nongshong dukan madan sha ki jaka ba la dep ithuh ha Civil Hospital bad kiwei ki jaka”.

Ha ka kyrwoh u Additional Secretary ka Tnad Urban Affairs, ula pyntip ia kane ka rai la shim ha ka jingialang ba la pyniaid da u Symbud Myntri  Rangbah ka Tnad Urban Affairs bad u Myntri ka Tnad Jngohkai, ka Myntri ka tnat ka rep ka riang, Myntri kam ri jingri bad ki nongmihkhmat na ka Tnad ka Koit ka Khiah, ka tnad Urban, PWD bad kiwei kiwei ki tnad sorkar. La pyntip ba shen kan pynbna ia kine ki jaka shong dukan madan bad yn ai por 30 sngi ia ki nongshong dukan madan ban kynriah hadien ba ioh ki syrnot, katkum ka skhim.“Ka Town Vending Committee (TVC) ka la iakren man ka por bad ki seng ki nongshong dukan madan bad ka la shim ruh ia baroh ki. sienjam ban pynthikna ba kane ka jingpynkynriah kan dei kaba iaid da ka pali. Ia ka Street Vending Plan ba la dep mynjur, yn sa buh noh shen ha ka rynsan paidbah” ka la bynrap.

Ban iada ia ka hok jong ki nongshong dukan madan bad ban teh kyndon ia ki kam shong dukan madan, ka Sorkar India ka la pyntreikam ia ka Street Vendors (Protection of Livelihood and Regulation of Street Vending) Act, 2014. Kane ka Act ka bthah ia baroh ki Jylla ban thaw ia ka Town Vending Committee, ban ithuh bad register ia ki nongshong dukan madan bad ban phiah ia ki jaka ba dei shong dukan madan bad ki bym dei. Ban pynbeit ryntih ia ka jingleh survey bad ban ithuh ia ki nongshong dukan madan kiba dei hok, ka Jylla ka la thaw ia ka Meghalaya Street Vendors (Protection of Livelihood and Regulation of Street Vending) Scheme in 2023. Kane ka skhim ka kren ia ki nongrum halor ka jingpynithuh ia ki jaka shong dukan madan bad ka rukom iaid ha ka jingpynbna ia ki. Kala kren ruh halor ka jingai ia ki Certificate of Vending (CoV) sha ki nongshong dukan madan kiba dei hok.