Ka seng kam don bynta ha ki jingïalang ban kynriah nongdie madan ha 9-Lad

Ka Meghalaya Greater Shillong Progressive Hawkers and Street Vendors Association (MGSPH&SVA) ka pyrshah jur halor ka jingkren bad jingialam bakla jong u Myntri ka tnad Tourism, u Bah Paul Lyngdoh ha ka jingpynphai ktien ia ka jingiakhih ki nongdie madan kiba dawa ia ka jingpyntreikam ia ki kyndon jong ka Ain kaba iada ia ka kamai jakpoh jong ki. Katkum ka kyrwoh na ka MGSPH&SVA ka la pynpaw ba u Paul Lyngdoh ula ong, “Ba ki la don ki jingialang kiba la shong bun sien hapoh ka jingpyniaid jong u Symbud Myntri Rangbah bad la thung ruh ia ka Committee ha kaba ki nongmihkhmat na ka liang ka seng ki nongdie madan ruh ki don”. Ula ban shuh shuh ba ia ki jingialang la buh ha ki jingthoh bad ka la shim por shi snem kynthih, kumta ka long ka bym don nongrim ban ong ba ym shym la kynjoh ktien ia ki nongdie madan. Kane ka jingkren u Bah Paul Lyngdoh ka dei kaba shu thaw bad ka pynpaw shai ba um tip ei ei shaphang ka Ain jong ki nongdie madan. Ka Meghalaya & Greater Shillong Street Vendors and Hawkers Association, ka kren shai ba kam shym don bynta ha ki jingialang ban pyrkhat ban pynkynriah ia ki nongdie madan na Khyndai Lad.

 “Ka Seng ka ngeit skhem ba dei tang ka Ain The Street Vendors (Protection and Regulation of Street Vending) Act 2014 kaba dei ka Ain ba shongnia kaba lah ban pynbeit ia ki kam jong ki nongdie madan. Dei halor ki kyndon jong kane ka Ain ba ka Seng ki nongdie madan ka la iashim bynta ha ka surbe ba la pynlong da ka provisional Town Vending Committee. Dei tad haduh ba pyndep ia  ki kam baroh katkum ki kyndon ka Ain bad ba la ai ia ki syrnot ha ki nongdie madan yn sa lah ban thaw ia ka Town Vending Committee ba pura ha kaba 40 ki dkhot ki dei ki nongdie madan bad halor kane ka TVC ka don hok ban thaw ia ki Vending Plan, ban kdew ia ki jaka ban shong ki nongdie madan, ka por ba kin shong die jingdie, ban pyrkhat ban pynkynriah ia ki bad kumta ter ter” la pynpaw ka MGSPH&SVA.

Ka la pynpaw ruh ba u myntri ka sorkar jylla u dei ban tip ba ki iew kiba la rim bad ki iew kiba shu long hi kum ka Khyndai Lad, Iewduh, Bimola, Laitumkhrah, Rynjah bad kiwei de ki dei ki jaka kiba yn ym don ba lah ban khang ia ki nongdie madan ban shong die jingdie. Ka por kala dei ban pynpaw pyrthei ia ka jingbieij jong u myntri sorkar uba la shu kren thaw nang bad ialam bakla ia ki paidbah halor ki kam ba iadei bad ki nongdie madan. Ka Seng Meghalaya & Greater Shillong Progressive Hawkers and Street Vendors Association ka dei ka Seng ki nongdie madan ba heh duh bad ki dkhot ki nongdie madan ki la noh synniang shibun ha ka ioh ka kot ka jylla ban kyrshan ia kiwei ki nongtrei nongbylla kiba duna jingioh bad kumta ka jingpyrshang ban kyndang jubor ia ki nongdie madan kan ktah jur ia ka ioh ka kot jong ka Sor Shillong. Ka Seng ka iawer ia u Bah Paul Lyngdoh, u myntri ka Sorkar Jylla bad kiwei de ki heh Sorkar sha ka Training kaba kyrpang ban ai jingtip bad jinghikai ia ki shaphang ka Ain The Street Vendors (Protection of Livelihood and Regulation of Street Vending) Act 2014 bad kiwei ki jingtip ha ki kam pynroi bad ban pynitynnad ia ka Sor.