U Myntri Rangbah ka Jylla Meghalaya u Conrad K. Sangma ula leit jngoh ia ka shnong Tangmang ba ha Pynursla Civil sub-division, East Khasi Hills ha ka sngi Saitjain, ka long ka sien banyngkong ba u myntri rangbah un leit niuh kjat ha katei ka shnong. Ia ka shnong Tangmang la tip ia ka jinglong tynrai jong ka palat arspah snem, la seng shnong da ki briew ba wad jaka rieh hadien ka jingkhynñiuh jumai ba la pynjot. Ka kyrteng jong ka, “Tangmang,” kaba mut “kaba dei thikna” ne “kaba biang bha,” ka pynpaw ia ka jingmut jong ka kolshor. Ka Tangmang ka pawnam na ka jingitynnad ka mariang, ki kshaid bad ki wah ba tuid sha them Bangladesh, ka Tangmang ka pawnam kum ka shnong shna bad thain tiar tynrai da u siej bad kiwei. Ha kane ka sngi la pdiang sngewbha ia u Myntri Rangbah ka Jylla da ki nongshong shnong, kiba la pyni ki tiar thain kti ba itynnad, khamtam ki sylliah ba thain kti.
U Myntri Rangbah ula pynpaw ka jingsngew tynnad ia ka jingtbit ki nongshong shnong ha ki kam thain tiar tynrai bad ula bthah ban thied ïa ki mar ban ai sngewbha sha ki riew pawkhmat bad ki ophisar ba wan jngoh ban kyntiew shuh ia ka kam shna jingshna ha Meghalaya.“Kane ka dei ka jingleit ba sah jingkynmaw”, u la ong. “Kum ka sorkar, ngi ngeit ka roi ka par ka dei ban long kaba pura bad haba ngi bei tyngka ha ki jingtei ba heh, ngi dei ruh ban kyntiew ïa ki jingtrei ban pynneh ia ka jinglong tynrai ki briew.” Ula ong ka sorkar ka angnud ban kyntiew ïa ka ïoh ka kot ha nongkyndong lyngba ki kam bapher bapher, bad kan ai kyrshan ïa ki nongthaiñ tiar tynrai bad ka dei ka jingthmu ba kongsan ka sorkar MDA. Lyngba ki skhim bapher ka sorkar kan iarap ïa ki Self Help Group (SHG) bad ki shnong ban pynkupbor ïa ki nongshong shnong bad kyntiew ïa ka imlang sahlang.
Ha kane ka sngi ula pynbna ruh ban shna ka Handicraft Training Centre ha shnong Tangmang ka ban don ki kor ki bor ka juk mynta ki mashin, ki jaka sah ki nongshah hikai na ki nongtrei thain kti ba tbit ha ka shnong. U la pynshlur ban kyntiew ia ka jingpynmih ia ki tiar thain kti tynrai bad ban wad ia ki iew shabar ka jylla ban pyniai iew ia ki tiar tynrai na Jylla.U Myntri Rangbah ka jylla u la pynlong ïa ka jingïalang CM-Connect ban ïakren bad bad sngap ïa ki jingeh ki nongshong shnong. Haba jubab ïa ka jingkyrpad uwei u samla pule ka thaiñ, ula pynthikna ba ïa ka iing thymmai na ka bynta ka Tangmang Secondary School yn sa mang pisa shen na Chief Minister’s Special Development Fund.