Ka skul Anderson ka jingsarong ia ka West Khasi Hills: Bah Gabriel Wahlang

Ka skul Anderson Higher Secondary School, Nongstoin ka la ioh ban rakhe ia ka sngi ba kyrpang jong ki kmie ki kpa lane ka Parent’s Day Celebration lyngba ki program ba kyrpang ba la iashim bynta da ki khynnah skul kynthup ia ki heprit naduh ka kyrdan Nursery kiba la pynshoh biej bad pynsngewtynnad shisha iala ki kmie ki kpa, ki nonghikai, ki nongshah khot sngewbha bad kiwei kiwei kiba la sakhilang ia katei ka sngi lyngba ka jingkiew rynsan jongki ban pyni ia ki jingshad lyngba ki rukom riam ba khampher, ki jingrwai ba sngewtynnad, ka jingpyni ia ki riam tynrai, ka jingrwai ieit Ri, ka phawer jingsneng tymmen, jingleh burom da kaba pyni ha rynsan ia ki nongthoh kot bad ki nongialam kiba la saindur ia ka jingnang jingstad ha ka jylla bad kiwei kiwei ki jingialehkai pynbyrngia ba bun jait. Ha katei ka sngi u Bah Gabriel Wahlang, MLA/MDC ka Nongstoin Constituency uba long ruh u nongaibuit jong ka sorkar jylla, jong ka Mining and Geology bad ka tnad Public Health Engineering u la long u kongsan katba u Bah H. K Thabah, Addl. Deputy Commissioner ka West Khasi Hills u la long u symbud kongsan ha ryngkat ka jingiadonlang u Pa’iem ka Hima Nongstoin u Pa’iem E. P Syiem, ki ophisar sorkar, ki nonghikai, ki knie ki kpa bad kiwei kiwei. Haba kren kum u kongsan ha katei ka sngi, na ka liang u Bah Gabriel Wahlang u la ong ba naduh ba u la long u nongmihkhmat, kane ka dang dei ka sien ba nyngkong ba un wan iuh kjat ha kane ka skul  bad u la ong ba naduh ba la seng ia ka ha u snem 1991, ka skul ka la sdang katba lah da ka jingpyrshang barit eh bad mynta pat kane ka skul ka la kiew shajrong ha ki liang baroh.

U la ban jur halor u synniang jong kane ka skul ban kyntiew ia ka pule puthi ha ka dong ka thain bad kane ka skul mynta ka la long iaryngkat bad kiwei pat ki skul ha ka jylla. U la ong ba ki kmie ki kpa ki dei ki riew shlur jong ngi bad ki la aiti met bad mynsiem ban pynbit pynbiang iangi, kumta ngim dei ban klet ia ki la ngi don ha kano kano ka kyrdan. Shuh shuh ula ai ruh ka jingiaroh ia ka skul Anderson kaba  la long ruh ka jingsarong ia ka West Khasi Hills na ka jinglah jong ka skul ban ioh 100 percent ka Pass Percentage bad na ka jinglah jongka ban sei ia ki khynnah kiba la wan shakhmat ha ki kyrdan bapher bapher. U la buh ruh ka jingkukar ba kum u nongmihkhmat un iai don ryngkat bad kane ka skul la ha kino kino ki bynta kiba ka skul ka donkam ia u ba iarap lem. Katba na ka liang u Bah H. K Thabah, Addl. DC ka West Khasi Hills u la kyntu ia ki knje ki kpa ba kin ym dei ban ailad iala ki khun ba kin pyndonkam ia ka internet khlem u pud namar ka lah ban poi sha ka jingialam bakla lyngba ki rynsan social media ba bun jait.

U la kyntu ruh ba kin long kiba phikir ia la ki khun ba kin lait na kaba ngop ha u drug bad kiwei pat ki jingsniew ba bun jait bad ban long kiba adkar ia la ki khun ba kin nym ngat ha ka shongkha khynnah. U la pynpaw ruh ba ka West Khasi Hills ka dei kawei na ki District kaba kiew bha ha ka jingdon ki khynnah ba pep skul shiteng por bad u la ban jur ia ki kmie ki kpa ba kin iatreilang ban kyntiew ia ki pule puthi jong ki khynnah. Hadien ka jingialang, la ioh ban plie ruh ia maw sah kynmaw na ka bynta ki nongseng jong katei ka skul bad kumjuh la ot ruh ia u Ribbon ban plie oyrda ia ka Exhibition Room jong ka skul.