Ka sorkar Assam ka la pynbiang ki pulit ryngkat ki suloi LMG

Ka Khun Hynniewtrep Awakening Movement (KHNAM) ka pynpaw ka jingsngewkhia halor ka jingbym ioh lad ki nongrep ka shnong Lapangap ha West Jaintia Hills ban leit ot kba uba ki la trei shitom baroh shisnem. Ha ka kyrwoh u Working President ka KHNAM u Bah Thomas Passah ula ong, ki nongrep na ka shnong Lapangap ki la pyrshang bun sien ban leit ot kba hynrei ki jaidbynriew Karbi na ka por sha ka por ki khanglad bad pynwit da kaba siat da ki jri. “Hynrei ngi sngew lyngdoh ban ioh sngew na u Myntri Rangbah ha kaba ula ong, ia ki nongrep katei ka thain ban kiar leit ot ia u kba, namnar ka kham kor dor ka jingim, ngi ngeit ba u Myntri Rangbah u sngewthuh lada um ioh khaw ban bam ruh kan don hi ka jingma ia ka jingim” la ong u Bah Thomas.

U Bah Thomas ula ong, ka KHNAM kam lah ban pdiang ia ka jingkyntait jong ka Sorkar Jylla ban iakren bad ka Sorkar Assam ban pynioh ki lad lynti ia ki nongrep ban leit ot kba. Ula ong ba lada ka Sorkar Jylla kam lah ban iada ia ki nongrep ka shnong Lapangap ban leit ot kba, ka dei ban siew bai lutksan (Compensation) sha ki nongrep bad ki paidbah nongshong shnong.

“Hadien ka jingkulmar ba la jia ha ka thain Lapangap ha kine ki khyndiat sngi, ngi ioh ki khubor ba ka sorkar Assam ka la pynbiang ki pulit ha ryngkat ki tiar ba biang naduh ki suloi LMG bad ki Special Forces ha katei ka jaka. Kaba sngewsih pat na ka liang ka Sorkar Meghalaya ka khlem don eiei kum kata ka jingpynkhreh ban ai jingshngain bad jingiada ia ki paidbah nongshong shnong jong ka Jylla” ula bynrap.