Ka sorkar Jylla kan iakren bad ka Sorkar Pdeng ban ioh bhah pisa na ka BADP

U Myntri Rangbah ka Jylla Conrad K Sangma hynne ka sngi ula kular ban sa iakren biang bad ka Sorkar Pdeng ban bhah pisa biang na bynta ban pyntreikam ia ki project bad ki skhim hapoh ka Border Area Development Programme (BADP) hapoh ka Jylla. Ïa kane u Myntri Rangbah u la kular haba jubab iaka Motion ba la wanrah da u MLA ka Nongpoh constituency u Bah Mayralborn Syiem halor ka mang tyngka lyngba ka BADP. Haba kren hapoh ka Iingdorbar u Conrad u la ong ba ka BADP ka dei ka prokram kaba kongsan bha ha ki jaka khappud bad kiwei ki Ri ba marjan na ka bynta ban pyntreikam ia ki kam pynroi.

U Conrad u la pyntip ba ka Jylla ha ki snem ba la dep ka la ioh pdiang ia ka song pisa ba T.40-50 klur hynrei ka Sorkar Jylla ka la ioh pdiang ia ka shithi na u Myntri ka tnat kam pohiing ka Sorkar Pdeng bad katei ka shithi ka kdew ba ka skhim BADP kan treikam tang haduh ka 30 tarik Nailur 2022. “Ha ka shithi, u Myntri Sorkar Pdeng u la pyntip ruh ba ia ka skhim BADAP yn dang shong bishar shwa da ka tnat Ministry ha shuwa ban phah sha ki Sorkar Jylla” la ong u Conrad.“Ka dei hangne ba kane ka prokram ka la kut noh. Ngi ju iakren beit bad ka Sorkar India hynrei ngim pat ioh ia ka jingpynthikna na ki, kumta ngi dang iakren khlem sangeh bad ka Sorkar India” u la ong.

Nalor kane, u Conrad ula kular ba un sa iakren bad ka Sorkar India ban pynthikna ba ka Meghalaya kan shah kynthup ha kane ka village prokram na ka bynta ka jingmyntoi jong ki briew kiba sah ha ki jaka khappud. Ha kajuh ka por, u Myntri Rangbah u pyntip ba ki iew khappud (border haat) ki la sdang plie biang ha kiba bun ki jaka jong ka Jylla.