Ka sorkar ka iatreilang bad ki ‘MAFIA’ ban lute ia ki paidbah, ong u Dr. A Chellakumar

Ka Congress ka la ther tyngeh ia ka sorkar ba la ialam da ka NPP halor ka jingbym lah ban teh lakam ia ki ‘MAFIA’ ba pyniaid lait lan ia u drok bad la kynnoh ruh ba ka jingjur jong kiba ioh ia u khniang jingpang HIV ha ka jylla ruh ka la kiew haduh 10 percent. U nongialam ka All India Congress Committee (AICC) uba peit ia ka Congress ha Meghalaya u Dr. A Chellakumar haba kren hynne ka sngi sha ki lad pathai khubor u la ong ba ka jingkiew u khniang jingpang ka long kaba shyrkhei bad ka bym lah mutdur bad kawei na ka daw ka long namar ba sorkar kam shimkhia ban tehlakam ia u drok. Ula kynnoh ruh ba ka sorkar ha jaka ban tehlakam ia u drok, ka la ia snohkti lang bad ki mafia ban pyniaid ia u drok bad ban kjit ia ka pisa jong u paidbah.

“Kane ka sorkar ka la lute ia ki paidbah ha jaka ban peit bad wanrah ia ka jingbha jingmiat jong ki paidbah hynrei ki lap miet ka thied ia ki MLA da ka pisa jong u paidbah,” la kynnoh u nongialam ka Congress u Chellakumar. Ula ong ba ka Congress kan sa rah bad kan sa iakhun pyrshah ia ka sorkar halor kane ka ishu. Ula bynrap ba watla ki don ki MLA kiba la iehnoh ia ka Congress party, hynrei kam salia eiei namar ba ka party kam shaniah ha ki riew shimet hynrei ka shaniah ha ki paidbah namar ba ka Congress kam thied ia ki briew kumba leh kiwei ki seng sain pyrthei.

Ha kajuh ka por, ula kob ba ka Congress kan trei shitom na bynta ban ioh ia ka jingjop ha ka ilekshon ha u snem 2028 bad ka la sngewtikna eh ba ha ka ilekshon GHADC, ka Congress kan khur ia ka jingjop.Une u nongialam ka Congress ula pdiang sngewbha ia u Zenith M Sangma sha ka Congress ha ka jingwan phai biang jong u bad kiwei pat ki nongialam kiba wan rung sha ka Congress kynthup bah Plostar Syiem na Nongpoh bad kiwei.