Ka sorkar ka kyrshan palat saw hajar ki skul shimet ban kyntiew ia ka pule puthi

U Myntri Rangbah ka Jylla Conrad K Sangma hynne ka sngi ula pynhap pyrda ia ka jingrakhe ia ka Platinum Jubilee jong ka Nongkrem Govt Upper Primary School ha East Khasi Hills. Haba kren ha ka jingialang u Conrad Sangma ula ai khublei ia ka skul halor ka jingiaid lynti 75 snem ban ai jingshakri ia ki khynnah ha ka pule puthi bad ula ai jingiaroh ia u synniang uba la noh da ki Principal barim, ki nonghikai bad ki khynnah pule bad ula kular ba kane ka skul kan ioh ia ka jingkyrshan ban sdang ia ka smart class room bad ka computer room na ka Chief Minister Special Development Fund (CMSDF).

U Myntri Rangbah ula pyllait paidbah ruh ia ka souvenir ne kot sah kynmaw jong ka platinum jubilee bad ula pyntip ba yn sa ai ia ki tiar tem tiar put sha ki khynnah skul ban pynshlur ruh ia ki ha ka tem ka put. Ula ong ba ka sorkar ka la pynlut T.1967 klur ha ka tulop ki nonghikai kaba kynthup ia T.684 klur ia ki nonghikai skul Sorkar bad T.917 klur ia ki tulop ki nonghikai adhoc bad ka jingkyrshan lyngba ki grant in-aid bad ula ong ba ym don kiwei pat ki Jylla ha ka thain shatei lammihngi kiba kyrshan lyngba ka Grant in Aid iaki skul shimet.

U Myntri Rangbah ula ong ba ka Sorkar ka la kyrshan ia palat 4000 tylli ki skul shimet ha Meghalaya lyngba ki grant in-aid bad ula ong ba katba ki nang jam shaphrang dei ruh ban ai jinghikai ia ki nonghikai ba kin lah pynbiang ia ki kyndon bala buh. Ha kaba iadei bad ka jingdawa ban kyntiew kyrdan ia ka skul sha ka Secondary & Higher Secondary, u Myntri Rangbah ula iathuh ba ka Sorkar kan donkam ia ka jingiasyllok halor kane ka mat.