Ka sorkar ka lah ban laisen Online ia ki nongbylla bar jylla, ong u bah Prestone “Ka EC ka dei ban pule bha ia ka Sixth Scheduled”

U Symbud Myntri Rangbah ka jylla u bah Prestone Tynsong ula ther tyngeh ia ka EC ha Khasi Hills Autonomous District Concil (KHADC), kaba la shu kynthoh ia ka sorkar jylla khlem da pule bha ia ka Sixth Scheduled jong ka riti synshar ka ri.Lah ban kdew ba u CEM ka KHADC u bah Winston Tony Lyngdoh dang shen ula kynnoh ia ka sorkar jylla ba ka ai laisen pathar ia ki nongtrei bar jylla ha shwa ba kin rung bylla ha ka jylla.

Halor kane, u bah Prestone uba dei ruh u Myntri ba khmih ia ka tnad District Council Affairs (DCA), ula ong ba ka EC ka KHADC ha shwa ba kan kynthoh ia ka sorkar, ka dei ban pule bha ia ka Para 12(A) jong ka Sixth Scheduled.“Nga kyntu ia ki nongialam ka EC ha KHADC ba ki donkam ban pule bha ia ka Sixth Scheduled,” ong u Symbud Myntri Rangbah ka jylla.U Symbud Myntri Rangbah u la pynkynmaw ba u snem 2019, ka sorkar jylla ka la pas ia ka Labour Act ba ia dei bad ki nongbylla, kane kam hap hapoh ka Sixth Schedule bad ula pynshai ba ia ka laisen sha ki nongbylla dei tang ka sorkar kaba lah ban ai katkum ka ain.

Shuh shuh ula ong ba ka sorkar ka la wanrah ruh katto katne ki jingpynkylla ha katei ka ain ha kaba ki nongbylla bar jylla ki lah ban aplai ia ki labour laisen lyngba ka online. Ula bynrap ruh ba hadien ba ki la aplai ia ka laisen, ka tnad Labour kan sa bishar ia ki kot ki sla bad kan phah sha ki pulit ban pynshisha ia ka jinglong jong ki. “Ki nongbylla bar jylla ki lah ban aplai online ia ka lisen na kano kano ka jaka ba ki don, hynrei ki dei pat ban aiti ia baroh ki kot ki sla ba donkam sha ka sorkar jylla. Hadien ba la bishar bniah ia baroh ki jingdonkam jong ki kot ki sla, ka tnad Labour kan sa ai ia ka laisen ,” ong u bah Prestone.