Ka Sorkar kam ju bakla ka jingsiew bai lutksan ia ki trai jaka: Prestone

U Symbud Myntri Rangbah ka Jylla uba khmih iaka tnat PWD (Road) u Bah Prestone Tynsong ula kyntait ban kren eiei halor ka jingkynnoh ka Hynniewtrep Youth Council (HYC) ba ki trai jaka ki shah dawa pisa (Commission) ban pyntrei iaka Shillong Western Bypass. Lah ban kdew ba dang shen ka HYC kala kynnoh ba u Bah Khyllait bad u bah Phridensong Thabah ki donkti ban dawa pisa (Commission) na ki  nongshong shnong hapdeng 10% haduh 30% na ka bai die jaka na ka bynta ban shna ia ka surok 2-lane Shillong Western Bypass. Haba kylli halor kane, u Bah Prestone u la ong “Ka shong ha ki trai jaka la ki kwah ia u briew uba pdeng ne ki kwah ban don mano mano ban mihkhmat ia ki sha ka Ophis na ka bynta ka jingsiew bai jaka. Ngam don ei ei ban ong”.

Haba kren sha ki lad pathai khubor u Bah Prestone u la kubur ba la iohi ha ki kot khubor halor kane ka jingiakynnoh markylliang bad u la bynrap daka ba ong “Ngam kwah ban kren eiei halor kane ka mat bad ngam lah ban kynthoh eiei namar ha ka jingshisha ka shong haka rai bad haka jingstad ki trai jaka”. U Bah Tynsong u la pynksan ba haba iadei bad ka jingsiew bai lutksan jaka, ka Sorkar kam shym la leh kano kano ka jingbakla bad kala dep ban pyllait lut ia ka jingsiew sha ki trai jaka. “Ka Sorkar hashuwa ban siew ia ka bai jaka, ka ju peit ia kawei pa kawei ka kot kaba ki don, la ka dei kaba shisha ne em, kaba ar, ngi donkam ruh ia ka jingpynshisha na u Rangbah shnong, u Syiem, na ka KHADC, kata la leh dei na kata ka daw ba ngi la lah ban pyllait ia ka bai jaka sha baroh ki trai jaka” u la ong.

U Symbud Myntri Rangbah u la kubur ba ka don ka jingkam bad jingkynnoh ba markylliang wat hadien baka Sorkar kala pyllait iaka pisa bai lutksan jaka.“Hadien bala pyllait iaka pisa ka ju don ka jingiaknieh jaka. Ka ju don ki jingwan kam ba kane ka jaka ka dei ka jong nga, u kpa, ka kmie peit hangne ia ki kot ki sla kumta, hynrei kata ka la dier ka por. Nga mut ban ong ngim ju pynbyrngia na ka liang jong ngi namar ngi la dep leh, ngi la dep pyndep ia ka kam baroh kawei bad wat lada ki leit sha ophis jong u District Collector ruh kin ioh lut ia kaei kaba ki kwah, baroh ki lah ban iohi lut, ki tip ia kata, katkum ka jingkhein ba la leh da u District Collector bad ruh da ki tnad bapher bapher kaei kaei ruh” u la bynrap.