Ka sorkar kan shimkhia ban thungkam ia baroh ki kam ba lait ha ki tnad sorkar

U Lat ka jylla u Ch Vijayashankar ula pyntip ha ka iing dorbar ba ka sorkar jylla kan thungkam ha baroh ki kam ba lait ha ki tnat treikam bapher bapher ka Sorkar Jylla. Ïa kane u Lat ula kren ha ka sngi sdang ka Dorbar Mang Tyngka ka Iing dorbar Thawain ka Jylla ha ka sngi Thohdieng. U Lat ka Jylla u Ch Vijayashankar ula ïathuh ha ka tnat pule la pynbna 1091 tylli ki kam nonghikai ba lait bad ka jingthung kam ka la pyndep bad ula bynrap ban thung ia 800 ngut ki nonghikai skul ka dang iaid shakhmat.Ha kajuh ka por, ula pyntip naduh ba pynkha ia ka Meghalaya Medical Services Recruitment Board (MMSRB) ha u snem 2023, la lah ban thung 468 ki doktor kynthup ki doktor bniat (Dentist) bad ka kam ban thung ia ki Nos ruh ka lajan dep.

Haba phai ha ka tnat pulit, u Lat ula ong ba ka jingthungkam ia palat 3000 ki kam ba lait ka la dep mynta. Nalor kane, ki District Selection Committee bapher bapher ruh ki la pyniaid shakhmat ban pyndep noh ia ka jingthung kam thungjam ha ki kam kiba lait.U Lat ula pynpaw ka Sorkar ka la pynmih ia ka Standard Operating Procedure ban thungkam hapoh ka por ba la buh ha ka Meghalaya Public Service Commission (MPSC) khnang ban kiar na ka jingpynslem ban pyntip ia ka jinglait kam bad jingpynbna ia ka result thungkam.

La dep thaw ruh ia ka Committee halor ka jingtreikam ka MPSC ban ai jingmut ban wanrah ia ka jingpynkylla ia ka jingtreikam, ula bynrap.