Ka sorkar kan tohkit ia ki Karkhana Coke ba treikam ha Meghalaya

U Myntri ka Tnad Taxation u Abu Taher Mondal hynne ka sngi ula pyntip ha ka iingdorbar ba ka tnad GST ka jylla ka la shimkhia ban tohkit ia ki karkhana thok ba treikam hapoh ka jylla Meghalaya. Haba jubab ia ka Zero Hour notice kaba la wanrah da u MLA ka VPP na Nongkrem u Bah Ardent M Basaiawmoit ha iingdorbar thawain, halor ki kaiphod ba kynnoh T.500 Klur ka GST ka don ha ka jingleh thok kynthup ia ki karkhana Coke ha Meghalaya, na ka liang u AT Mondal ula ong, “Nga pynthikna ia ka iingdorbar ba ka tnad GST ka jylla ka dang shimkhia ban tohkit ia ki karkhana thok ba treikam ha Meghalaya kaba donkti ban ai ia ka Input Tax Credit (ITC) sha kiwei pat ba don shabar ka jylla bad ia ka jinglap na kitei ki jingtohkit la pyntip lem sha ki bor sorkar jong kiwei pat ki jylla, khnang ba kan don ka jingiatreilang ban pynshitom pyrshah ia kitei ki karkhana thok kiba donkti bad ban pynshitom katkum ki kyndon”.

U Mondal ula pyntip ka tnad GST ka la phah jingthoh sha ka Directorate General of GST Intelligence (DGGI) ban kyrpad ban ai ia ki jingtip khnang ba yn lah ban pynshitom ia kitei ba ioh pdiang thok ia ka Input Tax Credit (ITC) hapoh ka jylla. Ula iathuh ki la don ki jingleh thok ba la lap da ki kynhun kum ka Directorate General of GST Intelligence (DGGI) ia kaba la pyntip man ka por sha ki bor sorkar bad haba ngi ioh pdiang ia kitei ki jingjia, la shim ia ki sienjam kiba tyngeh ba iaid ryntih katkum ka aiñ. Ka khubor ka la saphriang ha ka 20 tarik u Nailar 2025, ha kaba la kynnoh ba 4 ngut ki riewshimet ki la shah kem halor ka jingai thok ia ka Bill kynthup ia u Gaurav Agarwal, Deepak Agarwal, Vinod Agarwal bad u Guddu Singh na ka jylla Assam. Katba u Shiv Kumar Mittal u trai jong ka GM Coke Plant ha Byrnihat, Assam ula shah kem halor ka jingkiar ban siew ia ka GST ba la kot T.150-200 klur. U Myntri ula pyntip ka Directorate General of GST Intelligence (DGGI) kam shym la ai ki jingtip sha ka tnad GST ka Meghalaya halor ki karkhana Coke ba don ha Meghalaya la ki dei ba la ioh jingmyntoi na kitei ki kam buittuh.

U la iathuh ka jingpynbiang ia u dewiong hapoh ka jylla Meghalaya ka long kaba duna naduh ba ka National Green Tribunal (NGT) ka la khang pyrshah ne ‘Ban’ ia ki jingtih dewiong thliew khnai ha u snem 2014. Kumta ki karkhana Coke ki shaniah ia u dewiong uba la dep ban die lilam ha ki district bad ki la thied ruh ia u dewiong na shabar jong ka jylla. U la ong, “Ki jingtynjuh, ka shong eh ha ka jingpynthikna ia ka jinglong shisha jong kitei ki Invoices. Ki ophisar ka tnad GST kim lah ban khmih bniah ia ka ‘Returns’ jong ki nongsiew khajna ba la rejistar ha kiwei ki jylla. La pynmih thok ia ki Invoices ban ioh ia ka ITC ka bym shisha bad ki lah ban pynshisha ba ki dei kiba thok, lada u nongshalan ym dei uba don shisha, lada ki mar ne ka jingshakri kam dei satia kaba la don shisha ka jingshalan, lada ym shim la siew ka khajna kumba la kam lane la siew da kaba leh ne shna thok ia ka ITC” ong u Mondal bad ula bynrap ka jingtohkit ia ki nongshalan ne nongkhaii na shabar ka jylla ka hap hapoh ka bor jong ka Central GST, khamtam ka Directorate General of GST Intelligence (DGGI), ka don ka bor ban leit jurip ia kitei ki jaka treikam ba don ha kylleng ki jylla”. U la pyntip katkum ka GST Portal Records, hapdeng u snem 2022-23 bad 2024-25, 29 tylli ki karkhana Coke ki la treikam na ki 54 tylli ba la rejistar. Ka jingpynmih ha kitei ki snem ka long T.307.06 Klur bad ka Tax Liability baroh ka long T.18.75 Klur. Ha kaba T.15.84 Klur la dep ban pyllait lyngba ka ITC bad ka dang don ka pisa ba dang sah. Ha katei ka juh hi ka por, kitei ki karkhana ki la thied 1,48,134 MT u dewiong na shabar ka jylla uba shongdor T.72.49 Klur bad ka IGST ba T.24.57 Klur. U Myntri Sorkar ula pynshai ha ka kaiphod kam shym la kdew satia la ka jingshna thok ia ka ‘Invoice Billing’ ka dei ba iadon bynta bad ka jingdie ia u Coke da ki karkhana ne ka jingthied ia u dewiong kum u mar poh khyndew. Hynrei, namar ba ki kompani ba donkti ki dei ba don shabar ka jylla, kumta ka lah ban long ba ka jingleh thok ka shong ha ka jingthied ia u dewiong da ki karkhana Coke ba don ha jylla.