Ka sorkar MDA ka khaii dewiong beain bad kiwei ki mar shabar Ri: Saleng

U MP ka Tura u Saleng A Sangma ula kynnoh ba kane ka sorkar ba ialam ka NPP kam dei ba ka ai lad tang ia ka kam khaii beain ia u dewiong hynrei wat ia kiwei ki kam khaii beain ia ki mar shabar ri ruh ki jyllei bha. Haba kren sha ki la pathai khubor, u Saleng ula ong “Ka sorkar mynta ym tang ba ka la ai lad ia ka kam khaii dewiong beain hynrei wat ka jingkhaii beain ia kiwei ki mar shabar ri ruh ka jur bha.” Halor ka jingkhaii beain ia u dewiong ha thain South Garo Hills, u Saleng ula ong ba ka sorkar kam dei ban weng ia u Justice BK Katakey na ka Committee, hynrei ka dei ban ap ia ka jingtohkit jong u.

“Ka sorkar ka dei ban ap ia ka jingtohkit jong u Katakey uba la thung ka Meghalaya High Court, ym ban tuklar da kumwei ne ban weng ia u,” ong u Saleng. U Saleng ula ong ba kaba kham sngew sheptieng ka long halor ka jingjur ki kam khaii beain shabar ri na India sha Bangladesh bad na Bangladesh sha India. “ Ki jait tiar jait mar aiu ba wan na Bangladesh sha India ngim tip, hynrei ha kine ki lai saw snem ngi iohi ba jur ki nongdih drok ha kane ka jylla ha kaba haduh mynta ki don palat 3 lak tam kiba la kyrni ha ka kam dih drok. Kane kam dei ka kamkai hynrei kadei ka jingsngewkhia ia ka imlang sahlang,” ong u Saleng.

Ula buh jingkylli, ‘Balei kane ka sorkar ka ai laitlan ia ki kam khaii beain ha ka jylla. Ym tang ka jingkhaii beain ia u drok, ka jingtih bad khaii maw beain ruh ka jur bha ha kane ka jylla, hynrei ym ju don ka jingtalasi.”