Ka sorkar pdeng ka kyrshan ia ka Meghalaya ban kyntiew ka ioh ka kot $30 billion ha u 2030

Ka Myntri Sorkar Pdeng kaba khmih ia Pla Tyngka bad Corporate Affairs ka Nirmala Sitharaman hynne ka sngi ka la leit jngoh ia ka shnong Laitkynsew, East Khasi Hills District bad ka la iakren bad ki kynhun trei mon sngewbha ne ki Self Help Group(SHG) ki longkmie bad ki Lakhpati Didi bad ki Farmer Producer Organization (FPO). Ka Nirmala Sitharaman ka la pynpaw ïa ka jingsngewnguh kaba khraw ïa ka jingtrei shitom jong ka Sorkar Meghalaya ban pyntreikam ïa ki skhim jong ka Sorkar Pdeng bad ka Sorkar Jylla ha kylleng ka jylla bad ka la ban jur ïa ka jingdonkam jong ka roi ka par kaba kynthup lang ïa baroh bad ka jingpynkup bor ïa ki riewlum khnang ban pynurlong ïa ka jingthmu jong ka “Sabka Saath, Sabka Vikas.” Ia kane ka jingleit jurip ka Myntri ka Sorkar Pdeng la synran da ka Myntri Sorkar ka jylla ba khmih ia ka koit ka khiah bad ia ka rep ka riang ka Kong

“Lada ngi ngeit shisha ha ka Sabka Vikas, ka roi ka par ka dei ban poi sha baroh, la ki dei ki shynrang bad kynthei, shnong bad sor, samla bad tymmen, riewspah bad duk kumjuh,” la ong ka Myntri ka Sorkar Pdeng bad ka bynrap ba ka roi ka par kaba kynthup lang ka dei ban ai bor ïa uwei pa uwei u nongshong shnong ban bud ïa ki jingangnud jong ki bad ban pynthikna ïa ka jingim kaba don burom.Ka Sitharaman ka la iaroh ia ka jingkiew kaba phylla ha ka liang ka koit ka khiah, khamtam eh da kaba kdew ia ka jinghiar jong ka jingiap jong ki longkmie ba punkhun ha ka jylla Meghalaya kum ka dak ba khlain jong ka jingkylla ha ka jaka. Ka la ban jur ia ka bynta jong ki Self Help Group (SHG) ban wanrah ia kane ka jingkylla. Naduh u snem 2014, la pynlong ïa ka jingpynbor kaba ïatylli ban kyrshan ïa ki kynhun jong ki kynthei da kaba kyntiew ïa ka jingïoh ram, jinghikai, jingkyrshan ïa ka jingpynpaw kyrteng, bad ki jingïadei bad ki ïew ki hat. Ka la pynpaw ia ka jingkordor jong ka jingthmu jong ka Lakhpati Didi, kaba thmu ban pynthikna ba ym duna ia ka san ngut ki kynthei ha man la ka shnong kin ioh ia ka ioh ka kot kaba neh kaba T.1 lak ha ka shi snem.

“Ka jingioh mynsiem ka roi haba uwei na phi u ioh ia ka jingjop. Ka jingthmu jong u Myntri Rangbahduh ka Lakhpati Didi ka la ai mynsiem ia ki kynthei ha kylleng ka ri ban don ki thong ba kham heh,” ka la ong bad ka bynrap ba ka Sorkar Pdeng ka kular ban kyrshan ïa ka Meghalaya ha ka jingangnud jong ka ban don ka ïoh ka kot ba $30 billion ha u snem 2030, ka thong kaba ïahap bad ka roi ka par kaba kham heh jong ka India.Ka la ong “Ban poi sha kane ka thong, man la ka shnong kadei ban noh synniang. Lada ka Meghalaya ka lah ban pynurlong ia kane ka jingthmu, kan long kum ka nuksa jong ka thong jong ka ri ban long ka ri kaba la kiew ha u snem 2047,” kala ong.“Da ka jingkyrshan ba khlaiñ jong u Myntri Rangbahduh ka ri u Modi, ngi kut jingmut ban ïatreilang bad ka Sorkar Meghalaya ban pynurlong ïa kine ki jingangnud.” Ka kong Lahun Mary Blah jong ka Ieng Rasong SHG, ka la pynsngew hakhmat jong ka Myntri Pla Tyngka, ba ka la sdang treikam da ka ram kaba T.4,000 ban die jaiñ bad suki suki ka la nang pynroi ïa ka kam jong ka bad katba nang mih ki sngi, kala ioh shuh shuh ia ka ram, kaba kynthup ia ka ram kaba T.10000 ka Cash Credit ban sdang ia ka dukan die jain bad ka ram kaba T.1 lak tyngka na ka Community Investment Fund (CIF) na ka CLF ha u snem 2025, kaba la plié lad ia ka ban sdang ia ka jaka die sha bad ka jaka die syntiew. Ka la ong ba ki kam jong ka kim shym la kyntiew tang ia ka ioh ka kot jong ka hynrei ki la thaw ruh ia ki lad kamai ha ka thain. Ka jingmih ha ka shisnem ka la kiew na ka T.20000 sha ka T.3.4 lak, bad ka jingkynshew pisa shimet kaba palat T.4,080 ha ka SHG jong ka.