Ka sorkar shen kan sam shithi thungkam ia 3 hajar ha ka tnad pulit: Conrad

U Symbud Myntri Rangbah ka jylla uba khmih ia ka tnad Kam Pohiing, u bah Prestone Tynsong ula pyntip ba ki don 2832 ngut ki pulit ha ki san tylli ki shnat treikam pulit .Ula iathuh ba ha ki Police Station ki don 1431 ngut na ka jingdonkam kaba la mang 1843, ha Police Outpost ki don 380 ngut bad ka jingdonkam ka long 503, Traffic Branch ki donkam 439 bad mynta ki don tang 368 ngut, CID ki don 107 ngut bad ka jingdonkam ka long 121 bad ha SB ki don 546 ngut ka jingdonkam ka long 580.Ia kane ula jubab ha ka kynta kylli jingkylli ba la wanrah da u MLA ka Nongkrem u bah Ardent Miller Basaiawmoit hynne ka sngi ha iing Dorbar.U bah Prestone ula ong ba katkum ka kyndon jong ki Bureau of Police Research & Development, ka jylla ka donkam bun ki pulit.

Ula iathuh ba haduh mynta ki don 86 tylli ki Police Station ha ka jylla bad ha man ki PS ki don kumba 52-60 ngut ki Pulit.Haba bynrap jingkylli u bah Ardent, ula ong ba ki don bun ki Police Station kiba iakynduh jingeh namar ka jingduna briew.Halor kane, u Symbud Myntri Rangbah ula iathuh ba ka jingthep kam la dep bad hynnin ka sngi la dep pynbna ia ka resol ha kaba ym duna ia ka 3000 ngut bad shen yn sa ai ia ka shithi thungkam. Ula pyntikna ba ka sorkar kan lah ban pyndap ia ka jingduna ki pulit ha kino kino ki shnat ba donkam.

Ula bynrap, “Watla ka sorkar ka la thung ia kitei ki 3000 ngut, ka tnad pulit ka dang duna bun briew bha ha kaba ka sorkar ka la pynkhreh ban pyndap ia ki kam ba sah thylli khnang ban pynkhlain ia ka rukom treikam.” Ha kajuh ka por, ula iathuh ba ka sorkar, ka la pynkhreh mynta ba kan thep sa 1000 tylli ki kam ba sah thylli ha ki kam pulit.