U Nongaiktien ka Sorkar Meghalaya Democratic Alliance (MDA) u Bah Paul Lyngdoh ula ong ba ka jingkylli kam mih shuh, haba iadei bad ka kam ban pynkynriah ia ki nongdie madan na ki surok jong ka thain Khyndai Lad. Ia kane u Bah Paul ula ong da ka ba kdew ba mynta ka kane kam ban pynkynriah ia ki nongdie madan na Khyndai Lad ka la poi ha ka ain bad ka ka ain kan leh ia kaba donkam. Haba kren sha ki lad pathai khubor u Bah Paul u la ong ba ka Sorkar ka la dep ithuh ia ki 400 ngut ki nongdie madan ki ban hap ban kynriah ha kylleng ki jaka ba la dep ban ithuh da ka Sorkar Jylla.
Lah ban kdew ba ha ka step 26 tarik Jylliew ki tynghung jong ka tnat Shillong Municipal Board ki la sawa ha Khyndai Lad ban bthah ia ki nongdie madan ban leit die jingdie noh ha ki jaka ba la ithuh da ka Sorkar Jylla. “Kam mih shuh ka jingkylli, lano ka Sorkar kan pynkynriah ia ki nongdie madan namar kane ka kam ka la don bad ka ain bad ka ain kan leh ia kaba donkam, la phin (Nongdie Madan) kynriah ne em sha ki jaka ba la dep ban ithuh” la ong u Bah Paul. U Bah Paul ula kam ba ka jingbun palat ki nongdie madan ka la wanrah jingwit ym tang ia ki kali ba iaid hynrei wat ia ki briew ba iaid ha baroh kawei ka sor Shillong. “Ki surok ha nongbah Shillong kim dei tang na ka bynta kawei ka kynhun ba pyndonkam” u la ong.
U la ong ba hadien ka jingiasyllok bad ki tnat bapher bapher ha ka jingdonlang ka Town Vending Committee, ka Sorkar ka la ai jaka ia ki (Nongdie Madan). “Kim lah ban pynbor da kaba kam ba ka dei ka hok jong ki. Kam mih shuh ka jingkylli la kin kynriah ne em namar nalor ki nongdie madan, kiwei ruh ki donkam ia ki surok bad ki lynti iaid kjat (Footpath). Ngim pat ju ioh sngew ba kiwei kin thaw kynhun lane kin leit ujor sha iingkashari ba ka surok bad ka lynti iaid kjat ka dei ka hok jong ki. Balei ngin khanglad ia kiwei ban duh ia la ka hok” la u Bah Paul.