Ka surok Shillong-Dawki kan kyntiew ia ka khaii pateng ka India bad ka Bangladesh

U Myntri ka sorkar jylla u bah Lahkmen Rymbui ula pynpaw ka jingsngewkmen ba ka sorkar India ka la ai ia ka surok Shillong-Pynursla sha Dawki. U bah Lahkmen haba kren sha ki lad pathai khubor, ula ong ba kane ka surok Shillong-Dawki kan pynsuk ia ka khaii pateng ka India bad ka Bangladesh bad kan iarap ruh ban kyntiew ia ka ioh ka kot jong ki paidbah ka thain bad ka jylla hi baroh kawei.

“Ka jingai ka sorkar India ia ka surok na Shillong-Pynursla sha Dawki kan wanrah ia ka ioh ka kot jong ki paidbah bad kumjuh kan pynsuk ia ka khaii ka pateng hapdeng ka India bad ka Bangladesh,” ong u bah Lahkmen. Ha kajuh ka por ula pynpaw ka jingsngewdiaw namar ha kine ki bnai ba ladep, ka la don ka jingtwa jong ka khyndew ki maw na ka jingtih ia ka surok ha kaba ka la buh ia ki nongleit nongwan ha ka jingeh. Hynrei kaba sngewtynnad ka long ba na ka liang ka bor sorkar kum ka SDO, DC ki la peitngor bha da kaba pynjari ia ka iaid ka ieng ki kali khnang ban lait na kano kano ka jingjia ba sngewsih khamtam ha ka por ba slap na ka jingtih ia ka surok ka dang iaid.

Katkum ka jingong u bah Lahkmen, ula ong ba ynda la kut kane ka aiom slap, ka kompeni kaba ioh ban tih ia ka surok kan pynsted mar mar ban pyndep ia ka jingtrei khnang ban lait na ka jingma bad khnang ban nym thut shuh ka leit ka wan jong ki kali bad ki paidbah kiba iaid lyngba katei ka surok ha katei ka thain.