Ka surok Shillong-Dawki yn pyndep ha u Nohprah

U Symbud Myntri Rangbah ka jylla uba khmih ia ka Tnad PWD (Roads) Bah Prestone Tynsong hynne ka sngi, ula lum ia ka jingialang ban khmih bniah halor ka jingshna ia ki surok ki bapher hapoh ka jylla Meghalaya.Haba iakren bad ki nongthoh khubor, u Bah Prestone ula pyntip ha ka jingialang la iakren ha kaba ia dei bad ka Greenfield High-Speed Corridor Project, kaba jrong haduh 166.80 km na Mawlyngkhung, Umiam sha Panchagram ha khappud ka Assam bad kane ka la iai shaid shaid bad la jan dep ruh ia ka sorjamin ia ki jaka ha Ri-Bhoi bad West Jaintia Hills bad ban pynkhreh ban pynmih ia ka jingpynbna ban shim ia ki jaka.

“Nga thikna ba haba kut jong une u snem, ngin sa lah ban pyndep wat ha East Jaintia Hills ruh. Ngi don shibun ki jingeh namar ka jinglong ka jaka bad ki briew ki hap ban iaid kumba 2-4 kynta, kumta ka shim shibun ka por bad ruh namar ka aiom slap. Ka NHIDCL ha ryngkat bad ki bor District kin sa sdang biang ia ka kam naduh ka taiew ba nyngkong jong u Risaw bad nga thikna ba kin sa lah ban pyndep ia ka jingsorjamin ia kane ka surok haba kut jong une u snem” la ong u Symbud Myntri Rangbah.U la ong ba hadien ba la pyndep ia katei, ka sorkar ka kut jingmut ban pynthikna ba ka jingpyntreikam ia kane ka project shna surok kaba 166 kilometer kan long kaba iaid beit kaba ka Sorkar Pdeng ka la mang T.22,864 klur.

Nalor kane, u Bah Prestone ula iathuh ba ha kaba iadei bad ka surok Tura bypass kala iaid shakhmat bad kala poi ha ka bynta ban ithuh ia ki trai jaka na ka bynta ban siew ia ka bai jaka bad kumta la khmih lynti ba hapoh une u snem, yn sa lah ban pyllait noh ia ka bai jaka na ka bynta ban shna noh ia ka surok Tura bypass.Ha kaba ia dei bad ka jingshna ia ka surok Shillong-Dawki lyngba ka Package I,II,IV bad V, u Symbud Myntri Rangbah ula iathuh ba ula bthah ia ka kompani ba pyntrei ia ka project ba kan pyndep noh ia ka surok 4 Lane hapoh u Nohprah mynta u snem bad la khmih lytni ruh ba ia ka jingshna iaka surok ha ka Package II, IV bad V yn pyndep hapoh u Nohprah jong u snem ban wan.

Ula iathuh ba ki heh jong ka Company ki la kular ia ka sorkar ban pyndep noh ia ka jingshna ia ka surok 4 Lane hapoh u Nohprah mynta u snem bad ia kiwei kiwei ki package la khmih lynti ban pyndep ha u Nohprah 2026.Ha kaba ia dei bad ka jingshan ia ka surok Pynursla Bypass, ula ong ba shisien bala aiti ia ka jaka sha ka NHIDCL, ka jingpyntrei ia ka kam ka lah ban sdang noh. Ha kaba iadei bad ka jingshna ia ka surok Western bypass, u Bah Prestone ula iathuh ba ka jingiaid jong ki kam ka long kaba biang bha, watla ki don katto katne ki jingeh ba iadei bad ki jingiakam trai ia ki jaka kaba donkam ban hap pynbeit, hynrei la bthah ia ki Deputy Commissioner ka Ri-Bhoi bad East Khasi Hills ba kin pynbeit noh kham kloi kat kaba lah ia kane ka kam ban pyndep noh ia kane ka projek ha u snem ban wan.