Ka Tamasa pyninam bad shet jingbam tynrai ha Nan Palok

Ka Tnad Tourism ryngkat ka jingiatreilang bad ka Meghalayan Age Ltd kan pynlong ia ka tamasa shet jingbam ne ‘Culinary Cascade 2025’ ba lai sngi ban rakhe ia ka jingriewspah ka jylla ia ki jingbam tynrai bad kolshor ha Ward’s Lake ne Nan Palok naduh ka 1-3 tarik u Jymmang. Ka ‘Culinary Cascade’ kam dei tang ka tamasa die jingbam tynrai hynrei ka long ruh shibynta ka jingpyniasoh ia ka imlang sahlang bad ka tynrai ban pyndap ia kiba duna hapdeng ki pateng bad ban burom ia ka jingstad tynrai bad khamtam ban pynneh ia ka jinglong tynrai bad ki nongrep ka jylla. Ha kane ka tamasa yn pyninam ia ki jingbam tynrai, ki khana ba la pynwandur ia ka jinglong tynrai ka jylla Meghalaya. Ha kane ka tamasa ym dei tang ki jingbam tynrai hynrei kin don ruh ki jingbam na kylleng ka pyrthei bad kane ka iarap ban kyntiew ia ki jingbam tynrai ryngkat kiwei ki jingbam ha pyrthei. 

Kumjuh yn pyni ia ki mar rep ba pynmih da ki nongrep ka jylla, kum u slasha, Coffee kynthup ki jingdih tynrai bad ki jingbam tynrai ki jaidbynriew Khasi, Jaintia bad Garo ha kaba yn pyni ia ka Documentary ban batai bniah shaphang ka ‘Culinary Cascade’. Kan don ka jingpyni ia ka rukom shet da ki nongshet ba pawnam bad ki kynhun shet jingbam ha kaba ki nongwankai kin tip shaphang ka rukom thang doh, ka rukom pdem jingbam bad ki lah ban shim bynta ki nonghikai shet, ki nongthoh halor ka bam bad yn pyninam ruh ia ki tiar bad ki khiew shet jingshet. Kan ka jingdie ia ki jingbam kynthup ka dohsnam, ktung, shana-iong bad kiwei ha ka rukom tynrai bad ban die ki jingbam thymmai kum ka boba, ramen, jingbam Korea bad ki jingbam ba la pynkhreh da BYOChips bad ka Hotspud.

Ki nongshet pawnam kum u Jason White u khliehduh barim ka Michelin Star Restaurant Noma bad ki nongthoh ba pawnam halor ki jingbam kin wan ban shim bynta ha ka tamasa ban iasam jingtip ha ka rukom shet jingbam ryngkat ka kolshor tynrai bad kin don ki nongshet ba pawkhmat ka jylla kynthup ia u Ahmedaki Laloo, u nongseng jong ka A’origins uba la pynkhie im ia ka rukom shet jingbam barim bajah.