Ka UK-India Knowledge Exchange Workshop halor ka AI ba iadei bad jingkylla ka suinbneng bad polisi

Ka UK-India Knowledge Exchange Workshop halor ka kam kaba don nongrim ha ka AI kaba iadei bad ka jingkylla ka suinbneng kaba pynlong da ka British High Commission ha ka jingiatreilang bad ka IIM Shillong bad ka Sorkar Meghalaya, ka la wanrah lang ia ki riewshemphang, ki nongthaw polisi bad ki nongwadbniah na India bad ka UK. Kane ka prokram kaba ar sngi ka la long ka rynsan ban peit ia ki jingpynbeit lyngba ka AI kiba thmu ban pynbeit ia ki jingeh kiba iadei bad ka mariang bad ka jingpynbha ia ki polisi na ka bynta ka jingpeit ia ka mariang ha ka rukom kaba iaineh. Ha ka jingai jingkren, u Andrew Fleming, British Deputy High Commissioner sha ka thain mihngi bad ka thain shateilammihngi jong ka India u la ong, “kane ka UK-India Knowledge Exchange halor ka kam kaba don nongrim ha ka AI kaba iadei bad ka mariang ka dei ka sienjam kaba heh ban pynkhlain ia ki kam jong ka Meghalaya kaba iadei bad ka mariang da kaba wanrah ia ka jingtbit na UK ban kyntiew ia ka jingstad science kaba iadei bad ka mariang ha ryngkat ka jingtip ba bniah jong ka India shaphang kane ka thain. Ngi lah ban wanrah lang ia ki jingpynbeit ban iada ia ka imlang sahlang bad iaid sha ka lawei net zero. Kane ka jingiatreilang ka long ka jingprat lynti na ka bynta ki jingiatreilang ha ki por ban wan ha ki jingsaindur thymmai kiba iadei bad ka mariang bad ka jingiaineh.” Lyngba ka jingiatreilang jong ki jaka treikam kum ka UK Met Office, University College London, University of Leeds, University of Oxford, kane ka workshop ka la pynkhlain ia ka jingkut jingmut lang ban pyndonkam ia ki jingpynbeit da ka AI na ka bynta ki jingkylla kiba iadei bad ka mariang.

Ha ka jingai jingkren, u Prof. D P Goyal, Director ka IIM Shillong, u la ong ba ka AI kan pynkhlain ia ki kam kiba iadei bad ka mariang lyngba ka jingtip kaba bniah bad ki simulation, ka ban iarap ia ki kam jong ngi na ka bynta ka jingiaineh kum ka jingtyngkai ia ka um, ka jingsam ia ka bording, bad ka jingpyndonkam ia ki jingdon jingem ha ka rukom kaba seisoh tam. U Prof. TeidorLyngdoh, Chair External Relations, IIM Shillong, u la pdiang burom ia ki kynrem ki lyndan bad u la ban jur halor ka jingkongsan ban pynkylla ia ki jingiamir jingmut sha ki kam ba seisoh. U la ban jur ba ki jingiakren bad ki nongmihkhmatna UK ki pyni ia ka jingkongsan ban ioh ia ki jingseisoh, ka ban wanrah ia ki jingpynbeit lyngba ka AI ia ki jingeh kiba iadei bad ka mariang ha kine ki bnai ban wan. U Joshua Bamford, Head of Tech and Innovation Team, British High Commission India, u la batai bniah shaphang ka UK-India Technology Security Initiative, kaba peit ia ki kam bapher bapher, ba kynthup ka AI, ha kaba baroh ar tylli ki Sorkar ki la kut jingmut ban wanrah ia ka UK-India Joint Centre for AI ka ban peit bniah ia ka jingkylla ka suinbneng, ka jingiaineh, ka jingpynbiang pisa, ka jingshngain ha ki kam cyber bad ka kam ai jingsumar. Ka workshop ka dei ka sienjam kaba heh ban buh ia ka nongrim kaba iadei bad ka jingkylla ka suinbneng jong kane ka kam.

U Dr. Albert Chiang, Officer on Special Duty, Meghalaya Basin Development Authority, u la ban jur halor ka jingma ha Meghalaya namar ka jing bym thikna ka por slap bad ka jingjulor ki tyllong um. U la ong ba ka jingpynbeit na ka liang ka Sorkar Uk ka wan ha ka por kaba biang bad u la ong ba ka jingpyndonkam ia ka AI ban peit ia ka data jong kane ka thain kan don ka bynta kaba heh ha ka jingpynkhreh ia ka rukom treikam. U la ban jur ba ka jingiatreilang bad ki shnong kan long ka bynta kaba kongsan na ka bynta ka jingjop jong kane ka kam. Ha ka jingai jingsngewnguh, ka HaimantiPoddar, Senior Climate and Energy Adviser, UKFCDO, Kolkata, ka la ong ba kane ka sienjam ka la sdang ha u Naitung 2024 kum ka jingiasam jingmut bad ka la kylla sha ka workshop kaba seisoh kaba don ka jingiashim bynta na ki briew kiba don bynta ha kane ka kam na kylleng ka pyrthei ha IIM Shillong. Ka workshop ka la don ki bynta teknikal halor ki kam kiba iadei bad ka suinbneng ha ka thain shateilammihngi, ki rukom treikam ba biang tam jong ka UK ha ka jingpyndonkam ia ka AI ban peit ia ki kam kiba iadei bad ka jingkylla ka suinbneng, bad ki jingsaindur thymmai jong ka India kiba iadei bad kane ka kam. Ki riewshemphang na ki kynhun kum ka tnad Environment Forest and Climate Change jong ka Sorkar India, ka tnad Earth Sciences jong ka Sorkar India, IIT Bombay, IIT Delhi, CUSAT, Meghalaya Basin Development Authority, NLU Meghalaya, Meghalaya Technology Park Society bad kiwei kiwei ki la ai jingmut ha kane ka jingialang.