U Myntri Rangbah ka Jylla u Conrad K. Sangma hynne ka sngi Balang ula plie ia ka Williamson Sangma Meghalaya State Museum ha ka jingdonlang u Myntri ka tnad Arts & Culture u Bah Paul Lyngdoh, u Myntri ka tnad Bording u Abu Taher Mondal bad ki heh ophisar sorkar. Ia kane ka Museum ne ka jingbuh pyninam ia kiba rim kiba jah kiba ia dei bad ka jylla, ka dei kaba la Design ne pynwandur thymmai katkum kane ka juk kaba mynta bad ban pynlong ia ki briew kiba leit jngoh ia kane ka Museum ba kin sngewtynnad bad ban ioh ruh ia ki jingtip kiba kongsan ha ki bynta ki bapher bapher. Haba kren ha ka jingialang kaba la long ha Soso Tham Auditorium, u Myntri Rangbah ka jylla u Conrad K Sangma ula ong ha ka por ba ula leit ha ka sien kaba nyngkong ha kane ka Museum ha u snem 2018, ula sngew bynniaw bha, hynrei mynta u dap da ka jingsarong ban iohi haduh katno ki la lah ban iaid shakhmat.
Ula ong, kane ka Museum kam dei eh tang ka jingtei, hynrei ka long ruh kum ka jingphla kaba im ia ka jinglong tynrai jong ki jaidbynriew kane ka jylla, ka jingtbit ka jong ki bad ia ka lawei ban dang wan. U Conrad ula ong, kane ka sienjam ka dei shi bynta jong ka jingiohi jngai ban rakhe, ban buh ha ki jingthoh bad ban pynneh pynsah ia ka jingriewspah ka jylla ia ki jingdon jingem kiba rim jong ka Kolshor ha ryngkat bad ka jingkyntiew ia ka ioh ka kot. Ula iathuh ruh, ba ka tnad pule puthi kan sa pynmih ia ka jingbthah ban pynlong kongsan ia baroh ki khynnah pule ba ki dei ban leit jngoh ia kane ka Museum, ban pynngam ia jingsngewthuh ha ki shaphang ka kolshor bad ka jingiaroh hapdeng jongki samla. U Myntri Rangbah ula ong ruh ba ka sorkar kan sa tei ia kum kane ka Museum ha kylleng ki bynta jong ka jylla ha kaba yn sdang shwa na Tura bad yn sa bteng pat ha kiwei kiwei ki District kiba kongsan jong ka jylla.
Ula kren ruh halor ka jingpyrshang ka jylla ban thaw ia ka ioh ka kot da kaba kyntiew ia ka jingsengkam lajong kaba iadei bad ka kolshor bad ula ong, lyngba ka PRIME Program, ki nongsengkam lajong kila ioh ia ka jingkyrshan ban pynmih ia ki jingbuh sah kynmaw bad ki jingthain kiba don dor. Ula ong, “Kiwei ki ri kum ka Vietnam kila khaii ia ki mar kiba la pynmih na ki siej, ngi ruh ngi don ia ka lad kaba biang bha ban pynmih ia kum kitei ki karkhana kiba don ia ka jinglong tynrai ha ki”. Ula ong ruh ba ka Parish ha Sohra ka dei ka iing kaba don ia ka jingsah kynmaw ia u St. Don Bosco kumta ka sorkar kan ialeh ban kyntiew ia kane ka jaka lyngba ka tnad jngohkai ban pynneh pynsah bad ban pyninam sha ki nongwan jngoh.