Kam dei ka por ban shim kabu saiñ pyrthei, yn leh da kaba tyngeh ïa kiba donkti tih dewïong beaiñ

U Symbud Myntri Rangbah ka Jylla u Bah Sniawbhalang Dhar u la kyntu ban iai shah halor ka jingbthei bom dynamite ha krem dewiong, da kaba ong ba ka jinglong jingman kaba mynta kam dei ka por ban shim kabu ban ioh nong haka sain pyrthei, bad u la pynthikna ba ka Sorkar kan ym kynran dien ban leh daka ba tyngeh ia kito kiba donkti ha ki kam tih dewiong beain. Haba kren sha ki lad pathai khubor u Symbud Myntri Rangbag u phah ka jingsngewlem ia ki longiing kiba la shah ktah ha ka jingbthei bom dynamite kaba dang shen ha Mynsngat-Thangsko kaba la shim iaka jingim jong 28 ngut. “Nga phah ia ka khubor jingsngewlem sha baroh ki longiing kiba shah ktah. Sngewbha kynmaw ba mynta kam dei ka por ban ialehkai politik” la ong u Bah Sniawbhalang. U Bah Sniawbhalang u la pynksan ia ka jingkitkhlieh lang, da kaba ong “Ka la dei ka por ban shim ia ka jingkitkhlieh lang haba kum kane ka jingjia kaba sngewsih”.

U la pynthikna ba ka Sorkar ka la shim khia, da kaba phah ïa ki kynhun sha katei ka jaka bad ki heh Sorkar, kynthup ïa u DC bad SP, ki don ha katei ka jaka ban peit bniah ban bishar ïa ka jinglong jingman ha katei ka jaka.”Ngin ym pyllait ia uno uno u briew uba donkti” la ong u Bah Sniawbhalang bad u la bynrap ba ka Sorkar kan leh daka ba tyngeh ia kito kiba donkti ha ki kam beain.U Symbud Myntri Rangbah u la pdiang ia ki jingkynnoh pyrshah ia ka Sorkar MDA, da kaba ong “Ngi pyrshang katba lah ban tehlakam, ka Sorkar ka pyrshang pura ban tehlakam bad ban pynthikna ba kan ym don shuh ka jingtih dewiong beain ha ki por ban wan”. Haba ia dei bad ka kyndon ba donkam jaka kaba heh 100 hectare ban tih dewiong katkum ka juk stad mynta (Scientific Mining), u Bah Sniawbhalang u la ïathuh ba u Myntri Rangbah ka Jylla u la iakren ia kane ka kam bad ka Sorkar Pdeng da kaba kyrpad ban pynduna ia ka kyndon jingheh jaka ban ailad ia ki trai Jylla ban tih dewiong katkum ka juk stad mynta (Scientific Mining).

“Ha kaba ïadei bad kane, ngi la ïoh ïa ka dorkhas na ki trai par dewiong ha kaba kiba pynpaw ba ka jaka 100 hectare ka long kaba heh palat. U Myntri Rangbah ka Jylla ha kane ka shisnem ba la dep u la rah ïa kane ka mat bad ka Sorkar Pdeng da kaba kyrpad ïa ka jingdonkam ban pynduna ïa ka jaka khnang ba ki briew trai Jylla kin lah ban shimti ïa ka jingtih dewiong katkum ka juk stad mynta (Scientific Mining) ha kylleng ka Jylla. Kumta, kane ka kam ka dang don hapdeng ka jingïakren”. U Bah Sniawbhalang u la pynksan baka Sorkar ka pyrshah iaki kam beain daka ba ong “Ka Sorkar kam kyrshan ia ki kam beain. Namar kine ki briew, kiba pynleit jingmut ha ki kam beain, ki briew ki la duh ei iala ka mynsiem”. U Symbud Myntri Rangbah u la ong ruh ba ka jingsiew bailutksan kan dei katkum ka Policy jong ka Sorkar ha ryngkat bad ki jingtip ba bniah jong ki lanot ïa kaba yn sa pyntip paidbah hadien ba la pyndep iaka jingwad briew haka jaka ba bthei bom dynamite.