Kam don jingmut ban talasi i’u briew da la rung ha iing:KSU

Ka ain shongwai ne ka Meghalaya Resident Safety and Security Act (MRSSA) 2016 ka dang sah ha suin, khlem pat lah ban pyntreikam ha kane ka jylla.Ia kane ka ain, la da thaw ka sorkar MUA ha u snem 2016 ha ka jingialam u myntri rangbah u Dr. Mukul Sangma na ka bynta ban tehlakam noh ia ka jingwan rung laitland ki briew nabar sha kane ka jylla hynrei ka la kynduh mawsiang hadien ba ia ki khyrdop talasi briew, la pynsangeh noh ka kashari High Court Meghalaya. Ha u snem 2020, ka sorkar MDA-1, ka la wanrah ia ka jingpynkylla ia ki kyndon jong kane ka ain shongwai, hynrei kane ruh kam shym pat long kam satia haduh mynta namar ba u Lat ka jylla ula phah ia ka amendment Bill sha ka tnad kam pohiing ka ri India, kaba dang sahteng haduh kine ki sngi.Halor kane, la ioh ban iakren ia ki nongialam ki sengbhalang kiba kham paw ha ka jylla kynthup u President ka Federation of Khasi-Jaintia and Garo People (FKJGP) u bah Dundee Khongsit, u President ka Khasi Students Union bah Lambokstarwell Marngar bad kumjuh u President ka Hynniewtrep Youth Council bah Roykupar Synrem.

U bah Dundee ula ong ba halor ka MRSSA, ka seng ka la iakren ba ki nongkitkam shnong ki shem jingeh ban pyntreikam namar ba ki donkam ia ki kor computer, hynrei ka seng ka la iakren ba ka sorkar kan shu iarap shwa da kiwei ki lad ba kiba lah ban leh mardor kat bym pat ioh ia ki kor computer.U la ong ba ka MRSSA kan dei kawei ka ain kaba lah ban iada ia ka jaitbynriew kat bym pat ioh ia ka ILP. Ka jingrejister khamtam ia ki khyllah jait kiba wan sah kam dei ban ai palat ia ka 179 sngi, khnang ba kin ym ioh ia ka hok ban kylla nongthep vote ka jylla. Na ka liang u President ka KSU u bah Lambokstarwell Marngar ula ong ba ym lah sngewthuh shuh ia ka rukom pyrkhat ka sorkar namar ba ia ka ain khlem pat lah ban pyntreikam pura, ki la wanrah ia ka jingpynkylla. Shipor ki la pynieng ia ki khyrdop hynrei ki la kylla ieng jah. “Ka sorkar jylla ka la ong ba ka dang khmih bniah ka sorkar pdeng, ha kaba ia ka ain kaba shna ka sorkar jylla ka shah khang lad bad kane ka pyni ba ka sorkar kam shim khia ban iada ia ki trai muluk na ki briew nabar”, ula ong.

Ula ong ba ka sorkar ka shu bthah ia ki bor shnong ban lum ia ki briew kiba wan rung wan sah wai hynrei lada kam don ka khyrdop ban talasi, kam don jingmut ban shu shim kyrteng ynda la rung u briew shapoh ka iing. Katba u President ka HYC u bah Roykupar Synrem u la ong ba ka seng na ka por sha ka por ka seng ka pynkynmaw ia ka sorkar ia ka jingdonkam ban pyntreikam ia ka MRSSA hynrei i kumba ka sorkar, ka kynmaw ia u paidbah tang shwa ka elekshon, ka bym lah ban pdiang ia kane ka rukom pyrkhat. U la ong ba kumba long mynta ka jingpyntreikam ia ka MRSSA 2016 bad kam iapher na ka Tenancy Act. Ka jingrai ka High Court, Meghalaya kam ai lad ban talasi ia ka jingrung jingmih ki briew hynrei ka lah ban shu peit ia ka jingwan sah wai ki briew ha ki shnong bad kane kam lah ban tehlakam ia ki briew nabar. “Ka MRSSA 2020 pat ka dang sahteng namar ba u Lat u phah sha ka President halor kane, ha kaba ka tnad kam pohiing ka sorkar India ka dang pan jingshai na ka sorkar jylla. Kaba sngewsih ka long ba ka sorkar kam shym la khot ban iakren halor kane ka ain,” ula ong bad bynrap ba ka seng ka ieng ha ka nongrim ban pynkloi ban pyntreikam noh ia kane ka MRSSA 2020. Ula ong ba ka jingpyntreikam ia ka Special Intensive Revision (SIR), ka jingbeh ka Assam ia kiba sah beain, ka la don ka jingma kaba shyrkhei ia ka jylla na ka jingwan tuid ki briew nabar.