Kat bym pat don ki ain ba khlaiñ, ym lah ban ai lynti Rel ha Jylla: Saleng

U MP na Tura Parliamentary seat u Saleng Sangma ula ïathuh ba dangshen ula thoh sha u Myntri Rangbahduh ka Ri u Narendra Modi ban dawa pyniasoh ia ka Mendipathar Railway Station bad kiwei pat ki nongbah jong ka India bad ha kajuh ka por ban wanrah da ka Rel kit mar (Goods Train) ha rilum Garo. Haba kren sha ki lad pathai khubor u Saleng ula ong ba ka Mendipathar Railway Station ka rung hapoh rilum Garo hills tang 14 km napoh ka Jylla Assam bad namar kata ka jingdon jong ka Railway Station kam dei eh ka bah ba wan buhai shnong beain ki briew.

U Saleng ula ong ba ka Mendipathar Railway ka dei kaba rit bha bad namar kata ka jingdon jong kane ka Railway Station kam ktah iaka jingbun paid ki bar jylla hynrei lada pynheh bad pyniar ïa kane ka Railway Station, ha kawei ka sngi ka thaiñ Rilum Garo Hills kan sakhi ka jingwan bushai shnong beain ki bar Jylla. “Katba ym pat don ki ain ba khlaiñ ban tehlakam iaka jingwan rung ki briew shapoh kane ka Jylla bad sha Rilum Garo, da lei lei ruh ngam kyrshan ban pyniar iaka Mendipathar Railway Station sha kiwei pat ki thaiñ ka Garo Hills ne sha kiwei pat ki thaiñ ka Jylla Meghalaya” la ong u Saleng.

U Saleng ula ong ba ka jingdawa jong u na u Myntri Rangbahduh ka ri India, kadei ban pyniasoh ïaka Mendipathar Railway Station sha kiwei pat ki nongbah jong ki Jylla ka ri, kum ka Delhi, Bangalore, Kanyakumari, Mumbai, Delhi, Culcatta bad kiwei ki nongbah.U MP ula ïathuh ba haduh mynta ka Mendipathar Railway Station ka iasoh tang bad ka Guwahati Railway Station.Haba iadei bad ka jingdawa Rel kit mar (Goods Train), u MP ula ong ba ka jingdon ka Rel kit mar kan iarap iaki nongrep ban shalan iala ki bar ba ki rep ban ioh die sha kiwei pat ki Jylla.