Kem ki pulit 2 ngut ba donkti shna pisa, kurup T.7 lak ka pisa thok

Ki Pulit ka Assam jong ka STF kiba dang iakhun ia ka jingdon jong ka kynhun shon pisa thok (Fake Indian Currency Notes), ha ka jingkhynra mynta ka sngi ha ka thaiñ Khanapara, ki la ioh kem ia arngut ki briew kynthup ia u wei u ba dei u nongshong shnong ka Ri Bhoi District Meghalaya, ba la kynnoh donkti ha katei ka kam shna pisa thok. Katkum ka jingtip ba la iohlum, ki pulit ka Assam kiba la ioh jingtip halor ka jingdon jong ka kynhun shna pisa thok ha Khanapara, marmar ki pulit ki la leit ban khynra ha katei ka thaiñ, ha kaba arngut ki briew kiba la suba donkti ha kane ka kam thok, mar ia iohi ia ki pulit ki la phet krat ialade na katei ka jaka da kawei ka Kali Maruti Suzuki A-Star kaba don ia u number AS -02-F-8100 bad phet sha ka thain Kainadhara.

La iathuh ruh, ba ki pulit kiba la kthong ia katei ka kali, ki la ioh ban bat noh ia kitei ki briew ha Kainadhara -APSC road hajan ka Dispur Police Station bad kine ki arngut kiba la shah kem halor ka jingkynnoh donkti la tip kyrteng kum u Md Sahil Ali (21) na Karaibill, Bhaoria Bhitha hapoh ka Chhaygaon Police Station bad u Harsh Wahlang (20) na Baridua Khanapara kaba hap hapoh ka Khanapara Police Station jong ka Ri Bhoi District. Ha ka jingtohkit ki pulit, u Md.

Sahil Ali u la phla ia ka jingdonkti jong ki ha kane ka kam, bad ban ialam ruh sha ka iing shongwai kaba u pyndonkam kaba don ha 9 Mer Baridua Ri Bhoi District bad ha ka jingtalasi ki pulit ki la ioh ban kurup haduh 6,87,500/ ka pisa thok, kawei ka mashin shon pisa thok, kawei ka mobile, ka song kot sada ba la tah da ka brown tape, ka song kot sada kaba la shna ha ka dur kot 500, ka shi song ka kot ban print pisa thok bad kawei ka kali arshaka. Ki pulit ka Assam ki dang pynlong ia ka jingtohkit halor kane ka kam shon pisa thok kaba la sdang kynrei bha ha ka jylla Assam bad khappud ka jylla Meghalaya.