Khang tala ka VPP ia ka khyrdop JHADC, ia pyniania u Dy CEM bad MDC VPP

Ki MDC ka Voice of the People’s Party ha JHADC lem bad ki dkhot nongialam jong ka hapoh Rilum Jaiñtia mynta ka sngi ki la sdang ia ka jingiakhih kaba khang tala syndon ia ka khyrdop jong ka JHADC, namar ba ki ki nongtrei haduh mynta kim pat ioh tulop ba sahteng la 9 bnai, wat na ka liang ka party ka la ai jingthoh sha u CEM Thombor Shiwat bad dawa ruh na ka sorkar Jylla ban siew noh ka tulop ba sahteng hapoh ka 16 tarik mynta u bnai. Kane ka jingiakhih khang tala ka la sdang naduh ka por 9:30 mynstep, hapoh ka jingialam ki MDC VPP ba kynthup u Jamshaphrang Pohtam, u Awhai Andrew Shullai, u Nehimaia Lamare, u Daemi Liam, u Soki Lapasam, u Cresentus Susngi, ka Deiwipaya Tongper, ka Laiawanlamjinghun Khyriem nalor ki dkhot nongialam ka party VPP.

Shipor ka la iaid ka jingkhang tala na ka liang ki bor district ba kynthup u magistrate ka district West Jaiñtia u F. Passah lem bad ki pulit ki la wan poi ha kane ka jaka ban iakren sngewthuh jingmut. Hadien shipor ba la iaid ka jingiakhih napdeng ki nongtrei ka council ba la poi don kiba rung sha ki kamra treikam na ka khyrdop rit don pat kiba shu ieng bad shong sha surok.Kham hadien pat haba la wan poi u EM ka JHADC u Moonlight Pariat bad u Dy CEM ka JHADC u Lasky Rymbai ka la mih ka jingpyniania, namar ba kim lait rung kali shapoh ophis da kaba ong ia ki nongialam ka VPP ba kane ka jingleh jong ki dei ba kim kwah ban iatreilang bad ruh kane ka jingleh jong ki ka la pynthut ia kiba bun ki kam u paidbah.

Ki MDC VPP ki ong, ka daw ba ki iakhih dei bym ioh tulop, u Dy CEM ula pynshai na ka liang ka EC ki la lah pyndep ia ka kamram bad ka jingpynkhreh na ka bynta ka tulop ka la iaid bad ka lah ban poi ha ka por janmiet na ka bynta shibnai.Kumta na ka liang ka VPP ka la pan da ka jingthoh hynrei u Dy CEM u jubab ba kane ka jingpynshai jong u ruh ka la biang palat.Kumta na ka liang ka VPP ka la don haduh ka por janmiet bad hadien ba ka la ioh jingpyntikna na u Dy CEM Lasky Rymbai ba ka tulop na bynta shibnai ki nongtrei ka la poi sha ka council, kumta ka la sangeh noh ia ka jingiakhih bad plie ia ka khyrdop.U bah Jamshaphrang Pohtam MDC War Central haba kren ula ong, ba kin sangeh shwa shipor ia ka jingiakhih bad kin iai buddien ruh ia ki tulop ba dang sah, ki sngewthuh ba kane ka tulop shibnai kam pat lah ban pyndap ia ki jingdonkam ki nongtrei baroh hynrei ha kum kane ka por donkam ka la iarap khyndiat.