Khlad u nongai dud ba tynrah ka kali shipai

Nongpoh, Rymphang : U wei u briew u ba dei u nongai dud u la khlad noh ha ka jingjia shah tynrah kali, hadien ba katei ka kali kaba bud ia u heh ophisar ka Assam Rifles (Thar) ka la tynrah ia u tad haduh ba u la mynsaw jur, kane ka jingjia ka la jia ha ka por 11 baje eiei mynstep hakhmat ka Lad ophis u Deputy Commissioner ha Downgate, Nongpoh.

Katkum ka khubor na ki pulit, la iathuh ba u tei u rangbah ba la khlad noh na ki jingmynsaw kiba jur ha katei ka jingjia la tip kyrteng kum u Jonga Bahadur na ka shnong Shangbangla, Ri Bhoi District.

La ioh jingtip ruh, ba kane ka jingjia ka la jia katba kawei ka kali kaba bud ia u heh ophisar ka Assam Rifles, kaba don ia u number ML 05 Y 3232, kaba dang hiar na nongbah Shillong sha Guwahati Airport hamar ba poi ha katei ka jaka ka la tynrah ia ka bicycle kaba u tei u rangbah u la niah ban leit ai dud katba u dang thmu ban jam sha shilliang u surok bah tad haduh ba u la mynsaw jur, hadien katei ka kali ka la tynrah sa ia u divider tad haduh ba kawei ka tyre ka la bthei.

Na ka liang ki pulit ki la pynkit mar mar sha Nongpoh Civil Hospital, hynrei namar ka jingmynsaw kaba jur la pynkit noh sha ka NEIGHRIMS hospital Shillong hynrei tang mar ia poi ha kane ka hospital u ne u rangbah u la khlad noh. Ki pulit ki dang pynlong ia ka jingtohkit halor kane ka jingjia.