Khlem ka jingmynjur jong baroh ka Sorkar kam lah ban rai halor ka lynti Rel

U Symbud Myntri Rangbah ka Jylla Meghalaya u Bah Prestone Tynsong hynne ka sngi u la ong ba ka Sorkar kan sa lah ban shim ia ka rai halor ka lynti Rel tang hadien ka jingïalang ban iasyllok bad baroh kiba don bynta ha kane ka kam. Haba kren sha ki lad pathai khubor u Bah Prestone u la ong ba ka long kaba shisha baka Sorkar Pdeng ka kwah shisha ban pyniasoh daka lynti Rel sha baroh kawei ka thaiñ Shathei Lamihngi kynthup ha Meghalaya. U bah Tynsong u la iathuh ha ki nongthoh khubor ba u myntri ka tnad rel ka sorkar pdeng u la dei hok haba u la ong ba ka Centre ka dang angnud ban pyniasoh ia ka jylla Meghalaya bad ka lynti rel jong ka ri. “Kane ka jingkwah pyniasoh lynti Rel kam dei naka bynta ka jingmyntoi ka Sorkar Pdeng ne ka jingmyntoi shimet jongno jongno ruh-ka dei na ka bynta ka jingmyntoi jong ki paidbah ka Jylla” la ong u Bah Prestone.

U Bah Prestone u la pyntip ba u Myntri Rangbah ka Jylla u la thaw ia ka Committee ba kynthup ia baroh ki seng sain pyrthei, bad shen yn sa khot ia ka jingialang khnang ban lah ban iakren kaba laitluid shwa ban shim ia kano kano ka rai. “Nga hi nga sngew ba ngi donkam ïa ki lynti rel. Hynrei kam mut ba tang namar ba nga kyrshan, ka dei ban ïaid shakhmat khlem ka jingïasngewthuh jingmut jong baroh. Ngi dei ban shim jingmynjur lang na baroh” u la ong. Haba iadei bad ka jingdonkam daka da ki rel kit mar, u Symbud Myntri Rangbah u la ong “To ngin lum shwa iaka jingïalang bad hadien ka jingïalang ngin sa rai la kane ka projek ka dei ban ïaid shakhmat ne em.”

U Bah Prestone u la ban jur ruh ia ka jingdonkam ban don ki lad jingiada kiba treikam bha lada pyntreikam ia ki lynti rel bad u la ong ba ka Sorkar Jylla ka ïeng haka nongrim ba donkam ban pyntreikam ia ka Inner Line Permit (ILP) hapoh ka jylla.“Ka Sorkar ka kyrshan pura ia ka ILP. Ka Iingdorbar Thawain ruh ka la dep mynjur ia ka Resolution, bad ngi kwah ba kan pyntreikam noh ia ka” u la ong.