Khot ïakren u DC ïa ka MCTODA halor jingujor don khyrdop lum khajna beaiñ

U Deputy Commissioner ka Ri Bhoi District, u Abhilash Baranwal, mynta ka sngi u la khot ia ka jingïalang bad ki nongialam ka Meghalaya Commercial Trucks Owners and Drivers Association (MCTODA) ban ia kren halor ka jingdon jong ki 16 tylli ki khyrdop khrong khajna ha Ri Bhoi, kiba la pynpaw ba ki dei ki jaka khrong pisa beain na ki nongniah trok.

Ia kane ka jingïalang la pynlong hadien ba ka seng ka la ju pyntip shaphang ka jingeh ba ki dribar trok ki shem manla ka sngi, haba ki hap ban siew pisa ha ki khyrdop ba la tip kum ki jaka lum pisa jubor.

Ia ka kynhun na ka liang ka Association la lamkhmat da u President, Bah Mosklandar Marngar, ha ka jingdonlang u Secretary, Bah Peter Marbaniang, u Spokesperson, Bah Wanshuwa Nongtdu bad kiwei de ki dkhot.

Ha kane ka jingïalang, ka jingïakren kaba kongsan eh ka long halor ka jingkhanglad ia ki jaka lum pisa beain kiba pynkharoi ia ki nongniah trok ha ka District, ha kaba la pyntip ba ha manla ka khyrdop, ki dribar ki hap ban siew pisa kaba kot haduh 200 tyngka kawei ka trok.

U Deputy Commissioner u la pynpaw ka jingkitkhia halor kane ka kam, bad la ia mynjur lang bad ka Association ba kin iai treilang na ka bynta ban pynbeit bad pynduh noh syndon ia kitei ki khyrdop khrong pisa beain ha Ri Bhoi, namar ka la buh jingeh ia ki nongniah trok ha ka sngi ka ban wan.