Ka Director General of Police (DGP) ka Jylla ka Kong Idashisha Nongrang kala ong, ba ka kynhun kieng atiar be-aiñ ka Hynniewtrep National Liberation Council (HNLC) kala khring ia ki samla ban pyniasoh bad ka, lyngba ka jingkhroh ban ai ia ka jingsiew kaba bha bad ban trei na ka bynta ka ri bad ka jaidbynriew. Haba iakren bad ki nongthoh khubor hynne ka sngi, ka DGP kala ong, ki don bun ki samla kiba la shah khring ban pyniasoh bad ka HNLC bad ki samla kiba la pyniasoh kadei lyngba ka ‘Online’ bad kala ong, ka buit treikam jong ka HNLC ka long ban ai da ka jingsiew kaba bha bad ka kyrpad ba kin trei na ka bynta ka ri bad ka jaidbynriew.
Kala ong, ba ka jingkhring kane ka seng keing atiar be-aiñ kadei ia ki samla na ki jaka sor, khapsor bad ha nongkyndong.Ka DGP kala ong, ba kila ioh bun tylli ia ki kyrteng bad la ithuh ruh ia katto katne ngut ki briew hynrei haba peit ia ka jingiakren ka jongki ha ki rynsan social media, ki don bun bha bad katei ka jingiakren kadei ka jingiakren kaba nyngkong bad ka jingphah ia ki EPIC Card bad kiwei kiwei bad kim shym la iaid palat pud pat. Ka la kyntu ia ki samla ba kidei ban ianujor bad bishar ia ki jingkular bad ia ki jingshisha namar ha u snem ba lah dep, kila don 4 ngut kiba la wan pyndem wait, namar ka jingkular bad ka jingshisha ka iapher bak la bak bad bunsien hi kim lah satia ban pynurlong ia ki jingkular.
Ka DGP kala kubur ruh ba kila don kiba la leit phet sha ri Bangladesh bad kala kyntait ban ai ia kino kino ki jingtip ha kaba iadei bad kito kiba la leit rung shapoh ka ri Bangladesh bad kala ong, ba ka jingioh ia ka jingtip kam long kaba paka ne thikna bha.Ka Kong Nongrang kala iathuh ruh ba ka jingshah kem u Banjop bad u Donbok na Umsning kadei namar ba kila donkti ha ka jingbuh ia u bomb IED ha Umsning bad ki nongtohkit kila lap ruh ia ki video ha ki mobile phone kaba pyni kumno shna ia u bomb IED. Haba kylli la ka don kano kano ka jingiadei bad ka jingpynbthei ha ka par tih dewiong, ka DGP kala ong, “Hooid, ka lah ban don, tangba ngam pat kwah ban ong eiei halor kane, namar ba ka jingtohkit ia kane ka dang iaid shakhmat”.