Khrong khajna ka Assam ia ki nongrep ha Raid Nongtung ‘Ujor ka HYC sha u Border Magistrate’

Da ka jingsngewkhia kaba jur halor ka jingioh jingujor na ki nongshong shnong ka thaiñ Raid Nongtung ha kaba ia dei bad ka jingshah lum khajna beaiñ na ki bor ka Assam, mynta ka sngi ki nongialam ka Hynniewtrep Youth Council (HYC) ki la leit ban dawa na ki bor pyniaid district ka Ri Bhoi ban tohkit bad shimkhia halor ka jingeh ba la mad da u paidbah ba shong basah ha khappud ka Meghalaya bad Assam. Na ka liang ka HYC ba la lamkhmat da u Bah Hercules Suting, President ka Ri Bhoi District Unit bad ruh kum u President ka Raid Nongtung Circle, la synran lang ruh da u General Secretary ka Raid Nongtung u Samla S. Masharing ki la iakynduh bad buh ia ka jingujor hakhmat u Bah Raja Brahma u ba dei u Additional Deputy Commissioner u ba dei ruh u Border Magistrate.

U Bah Hercules Suting, kum u nongialam ka seng u la pynpaw ia ka jingsngewkhia kaba jur halor ki jingeh ba la hap ban mad da ki paidbah ba shong basah ha ki thaiñ khappud hapoh ka Raid Nongtung tang namar ka jingshah leh donbor ha ki briew jong ka Assam na ka por sha ka por khamtam ruh ka jingkhrong khajna beaiñ da ki briew ka Assam kaba la ktah jur ia ki paid nongrep katei ka thaiñ Raid Nongtung. Ula iathuh ruh, ba ka seng ka la ioh ia ka jingujor halor ka jingdon jong ka khyrdop khrong khajna beaiñ jong ka Assam hapoh ka shnong Lumsohphoh kaba hap hapoh ka Raid Nongtung ba la pyndonkam jubor da ki briew ka Assam napoh ka West Karbi Anglong, kaba la ktah jur ia ki nongrep kiba ju I’m jakpoh da ka kam rep.

Shuh shuh ruh, la pynsngew ba na ka liang ka seng ka dap da ka jingsngewkhia kaba jur namar ba wat hapdeng ka jinghiar dor jong ki mar rep, ki nongrep ka thaiñ Raid Nongtung ki la hap ban siew pat sa ia ka khajna sha ki briew ka Assam, kumta ka seng ka la dawa ba ki bor pyniaid district ka Ri Bhoi ba kin shimkhia mardor halor kane ka jingeh ba la mad da u paidbah khamtam ki paid nongrep.