Khylliap lama ka AITMC ha Umroi, thaw da ka UCPF ban iakhun ilekshon MDC

Hadien ka jingshah rem noh ha ka ileksion MLA 2023 bad kum ka jingpynkhreh ia ka ileksion MDC kaban sa long shen, ki nongialam ka All India Trinamool Congress (AITMC) ka Umroi Konstituensi ba la lamkhmat da u Bah George B Lyngdoh lem bad katto katne ngut ki nongialam ki la rai ban mih na kane ka party bad ban thaw thymmai noh ia ka kynhun thymmai kaba la jer kyrteng kum ka Umroi Constituency Progressive Forum (UCPF) shibynta ban nang pyntyllun ia ki kam shakri paidbah hapoh ka Umroi Konstituensi. Ia kane ka rai, la pynpaw paidbah ha ka jingialang jong ki nongialam ka AITMC kaba la long ha Umroi, ha kaba la ia donlang ruh da u MLA barim ka Umroi Konstituensi u Bah George B Lyngdoh u ba dei ruh u kyrtong ka party AITMC ha ka ileksion MLA u snem 2023 nalor kiwei kiwei ki nongialam kane ka party.

Ha ka jingialang kaba la iathir sani ia ki mat treikam ban shakri ia ka bha ka miat u paidbah ka Umroi Konstituensi, ha kaba la rai ban thaw noh ia ka Umroi Constituency Progressive Forum (UCPF) ia kaba la seng da ka kynhun ki nongialam ba kynthup ia u Bah Pynskhemlang Sohtun, President, u Bah M.D Syiem, Working President, u Bah Fasterbes Sohiong, General Secretary, u Bah George B. Lyngdoh, MLA barim ka Umroi lem bad shibun ki nongkyrshan ka TMC.Ha ka jingkren paidbah ha kane ka jingialang, ki nongkren lyngba ki nongialam, ki la pynpaw shai, ba ki paidbah ka thaiñ Umroi kim pat lah ban sngewthuh ia ka rukom treikam ne ki mat kiba ka parti TMC ka don ban shakri paidbah ha kaba kum ki paidbah ki la pynshai lyngba ka resol jong ka ileksion MLA kaba la dep ha u snem 2023 kaba paw shai ba ki paidbah kim pat lah ban pdiang ia ka party TMC.

Na ka liang u Bah George B Lyngdoh, haba kren paidbah u la pynpaw ia ka jingkmen bad ai khublei kyrpang ia baroh ki paid nongkyrshan ka Umroi Konstituensi kiba la kyrshan ia ha ka ileksion MLA 2023 da ka jingangnud ban iai ai ka jingshakri paidbah kaba janai tam na kawei ka snem sha kawei pat. U la iathuh ruh, ba naduh ba u la shah rem noh ha ka Ilekshon 2023, u la buh ia ka shithi iehnoh kam ban long kum u President ka TMC ha Umroi bad ruh kum u Vice-President ka TMC ha ka jylla. Shuh shuh ruh, kum u wei na ki nongmihkhmat paidbah, u la pynpaw ba lyngba ka UCPF, kaba ka kynhun kaba thymmai hynrei ka don ia ka jingthmu ban ai ka jingshakri na bynta ki paidbah ha Umroi Constituency.