Ki jaidbynriew Riewlum ha Karnataka

Ki jaitbynriew ne kita ki tribe kiba la ju khot kum ki Jenukuruba bad ki Bettakruba kiba sah sha ka bynta ba shathie ka jylla Karnataka ha Mysore District kaba don ha khappud bad ka Kerala, ki dei ki briew kiba dang sahdien ha kiba bun ki liang bad kiba dang long riewkhlaw bha ha katei ka jylla.Ka shnong kaba ki sah ka don ha ka Nagarhole National Park, kaba tip ruh kum ka Rajiv Gandhi National Park kaba hap ha ka Mysore District hapoh ka Kakanakote Taluk ne ka Block bad ka jngai kumba 100 km na Mysore.

Kine ki briew ha katei ka shnong ki kren da ka ktien Tamil, Telegu, bad Malayalam bad ka jingmut jong ka ktien Jenukuruba ka mut ki briew kiba im ha ka kam ri ngap ha kaba ka ktien ‘Jenu’ ka mut ka umngap katba ka ktien ‘Kuruba’ ka mut ki briew..Kine ki jaitbynriew ki im ki sah ki im hapdeng ka khlaw bad kim treh ban leit sha kiwei ki jaka namar ba ki la juh bad ki im bad wad bam na khlaw ban pyndap ia ka ja kpoh jong ki kaba man la ka sngi.Ha ka jingleit jngoh ki nongthoh khubor na jylla Meghalaya bad Tripura dang shen sha katei ka jylla, la ioh jingtip ba kine ki jaitbynriew Jenu Kuruba kiba don kumba 160 tylli ki tnum iing ki don ka jingiadei bad ka khlaw ka btap bad ki iing ba ki shong ki sah la shu sah tap da ki turpar bad lape da ki dewbyrtha.

Ha kane ka jingleit jngoh, la iohi ba ki iing ki sem jong ki, kam long kaba khuid kaba suba bad kine ki briew ki pyndonkam da ka ding sngi ne solar light ban ai jingshai.Ha katei ka shnong ba ki shong ki sah, ka don ia ka Aganwadi bad ka skul primary ha katei ka jaka.Katkum ka jingiakren bad ki, kaba la pynkylla phareng da ki ophisar, la iathuh ba ki ioh u khaw rashon na ka sorkar India bad ka don ka skul Primary bad ka um kor kaba la wanrah ka sorkar bad ka jaka sumar kaba jan tam ia ki, ka jngai kumba 10 km na ka jaka kaba ki sah. Ki sah ha ka khlaw kaba iaid lyngba ka surok na bynta ka Karnataka kaban mih shaduh ka jylla Kerala ha Wayanad district.Ha ka jingshisha, namar ba katei ka jaka kaba ki sah, hap ha ka Tiger Reserve Forest, ka sorkar ka la kwah ban pynkynriah ia ki sha kiwei ki jaka hynrei kim treh ban mih.La iathuh ba namar ba ka dei ka jaka kaba don ha syndah ka Tiger Reserve Forest, ka don ka jingjia ba ki shah hiar thma ha u khla ruh bad don kiba la mynsaw. Katkum ka jingiakren, la iathuh ba kine ki briew ki don ka jingsngewthuh ban iada na ki mrad khlaw, bad ki sngewthuh ba ki wan ki mrad ruh shajan jong ki.