Ki Jain Ryndia na Meghalaya la ithuh da GI Tag ka India

Ka jylla Meghalaya ka la jam sha uwei pat u mawmer, ha kaba ka jain Ryndia ryngkat bad ki jingthain da ki kti, kiba la pynmih da ka jylla ka la ioh ia ka jingithuh ia ka Geographical Indication (GI) Tag na ka Sorkar India. Ka Geographical Indications Registry, hapoh jong ka Intellectual Property Office kala pynmih ia katei ka jingpynbna bad la pynmih ruh ha ka website jongka. Ka Tnad Texitiles jong ka jylla kala lam khmat bad trei shitom ryngkat ka jingkyrshan jong ka NABARD bad ka jingioh jingkyrshan na u riewshemphang ka GI u Dr. Rajnikanth, kiba la shimkhia ban ai jingkyrshan ia ka jingaplai lang jong ka Tnad Textiles bad ka Meghalaya Ryndia Producers Association ban ioh ia ka GI Tag ia ka ‘Ryndia’, ha kine ki 4 snem kiba la dep. Ia katei ka sienjam la shim da ka tnad Texitiles tang hadien ba la dep pynbna ia ka shnong Umden-Diwon kum ka Eri Silk Village kaba nyngkong eh ha ka jylla ha ka 12 tarik u Rymphang 2021.

U Principal Secretary ka Tnad Textiles u Bah Frederick Roy Kharkongor ula ialam ia ka kynhun kaba kynthup ia ki heh ophisar ka Tnad Textiles, ki dkhot jongka Meghalaya Ryndia Producers Association bad ki nongthain kti, ban ai jingkyrshan ia ka jingaplai ban ioh ia ka GI ha ka jingialang jongka Consultative GI Group kaba la long ha Kolkata ha ka 20 tarik u Naiwieng 2024. Kitei ki jingshimkhia kiba la iaid beit ryngkat bad ka jingiohi jngai jong u Myntri Rangbah ka jylla u Conrad K. Sangma bad u Myntri ka Tnad Textiles u Bah Paul Lyngdoh kibala ia shimkhia ban kyntiew ia ki mar tynrai kiba kyrpang kiba la pynmih da ka jylla bad ban pynthikna ba kidei ban ioh ia ka jingithuh na ka GI.

Kum ban shu pynkynmaw, u Myntri Rangbah ka jylla u Conrad K Sangma haba iashimbynta ha ka dorbar mang tyngka kaba dang shu dep jong ka jylla ula phong da ka jain Ryndia hapoh ka iing dorbar bad ula kyntu ia ki Nongmihkhmat jong ka iing dorbar ban kyrshan bad kyntiew lem ia ki nongthain jain jong ka jylla.U Myntri Rangbah ula kular ruh ban phah ia ki jain ryndia sha ka Ophis jongu Myntri Rangbahduh ka Ri bad sha ki ophis jong baroh ki Myntri ka Sorkar Pdeng.