Ki kam pynroi ki paw pyrthei, ïaroh u Bah Charles ïa ka Sorkar MDA

U MLA ka NPP na Mawhati constituency u Bah Charles Marngar hynne ka sngi u la ïaroh ïa ki kam pynroi bala wanrah daka Sorkar Meghalaya Democratic Alliance (MDA) da kaba ong ba ka MDA ka mut ‘Master of Development with Action’.
“Mynta ka sngi nga ieng hangne ban ai khublei ia ka Sorkar Jylla, kata ka Sorkar MDA na ka bynta ki kam kiba kala leh na ka bynta ki briew jong ka Jylla. Ki kam pynroi kiba lah ban ïohi, ka jingkiew ka Jylla ka long kaba lah ban thew bad ka jingtreikam ka paw” la ong u Bah Charles.
U Bah Charles u la ai ka jingïaroh ïa ka Sorkar kaba la pyntreikam ïa ki skhim wat ha ki constituency ba la mihkhmat da ki MLA naka Liang Pyrshah, da kaba ong, “Kane ka pyni ba ka Sorkar kam shah ïalam ha ka jingïapher ha ka saiñ hima sima hynrei ha ka jingangnud ba shisha ban pynurlong ïa ki jingdonkam bad ki jingangnud jong ki paidbah ha man la ki constituency”.
Da kaba pyndonkam ïa ka kyntien Khasi ‘LAHUN’ u Bah Charles u la ong “Nga lah ban nym sngewhun 100%… Hynrei hadien ba nga la rung ha kane ka Sorkar, nga sngewkmen shisha ban ïasam ba ka constituency kaba nga mihkhmat… khatduh khatwai ka la sdang ban ïohi ïa ka jingshai jong ka jingkyrmen.”
Haba pynpaw ïa ka jingkiew hapoh ka constituency, u MLA Ka Mawhati u la kdew ïa ka jingpyndep ïa ka surok PMGSY kaba 20 km na Mawlasnai sha Kdohhati, bad ka jingtrei kaba dang ïaid shakhmat ha kiwei pat ki project.
U Bah Charles u la ai khublei ruh ia ka Sorkar na ka bynta ki jingthmu kum ka JJM, ka jingthaw ia ki block CRD, bad ka CM ASSURE, ka skhim kaba iarap iaki nongrep synsar da kaba pynkiew ka dor na T.25 haduh T.30 sha ka T.55 shi kilo, kaba la ai jingmyntoi ia palat 13,000 ngut ki nongrep.
“Kane ka dei ka sien kaba nyngkong ha ka histori jong ki nongrep synsar ba kum kane ka jingïarap kala wanpoi” u la ong.