Ki nongrep ki lah ban ‘Register Online’ ban long dkhot ha ka NPFF ban ioh jingmyntoi

Ka National Peoples Farmers Front (NPFF) ka shnat treikam jong ka National People’s Party (NPP) ban peit ia ka jingeh ki nongrep ka la pyllait paidbah ia ka Online Registration Membership Form (ORMF) kum shibynta ban khring ia ki nongrep ban long ki dkhot ba kin ioh ki jingmyntoi kaba ia dei bad ka rep kam riang. Ia kane ka ORMF la pyllait da u Myntri ka rep ka riang u Timothy D Shira kum u kongsan ha ryngkat ka jingdonlang u Chairman ka NPFF Bah HM Shangpliang bad ki President ka NPFF na ki District ha ka jingialang ha ka ophis treikam ka NPP ha Bivar Road, Polo, Shillong.

U Timothy D Shira ula pynpaw ia ka jingsngewtynnad ban iakynduh markhmat ia ki nongkitkam ka NPFF kiba la wan na kylleng ki District ka jylla bad ula ong ba u tip bha ia ka jingeh ki nongrep bad ula bynrap watla u shong shuki myntri mynta hynrei mynshwa u dei u nongrep. Ula pynpaw ka jingsngewkhia halor ka jingiap tram jong u kwai bad kiwei ki mar rep, namar kane la ktah bha ia ki nongrep bad kyntu ia ki nongialam ka NPFF ba kin leit pynshai ia ki nongrep ha kylleng ki shnong halor ka kam rep bad ban pynrung kyrteng ha ka NPFF. Katba u Bah HM Shangpliang ula ai khublei ia u State President jong ka National People Party u Bah Prestone Tynsong bad ia u National President u Conrad K Sangma kiba la ai mynsiem ban iaid shakhmat ban pyniar ia ka rukom treikam jong ka NPFF.

Ula ong ruh ba hapoh ka jylla Meghalaya dei tang ka seng NPP ba don la ka jong ka shnat treikam ban peit kyrpang ia ki nongrep, katba kiwei ki seng sain pyrthei kim don satia. Kane ka dei ka sien ba nyngkong eh ba ki President ka NPFF na ki district kin ioh ia kynduh markhmat bad u myntri sorkar bad ruh ban pynsngew ia u halor ka jingeh ba ki paidbah nongrep na ki District ki iakynduh jingeh.