Ki paidbah kim pyrshah ker sainar shiah ha khappud, hynrei ki bynnud ka jaka rep: Lakmen

U MLA ka Amlarem u bah Lahkmen Rymbui u la ong ba ki shipai Border Security Force (BSF) ki la pyrshang katba lah ban pahara ban pyrkhing ia ka jingwan rung beain ki bar jylla na ki thain khappud ka jylla. Haba kren sha ki lad pathai khubor u bah Lahkmen, ula ong ba  kam long kaba suk ban pahara ha ki jaka khappud la ka long ia ki jaka ba la dep ker sainar ne ki bym pat dep ker sainar. Hynrei na ka liang ki pulit bad ki shipai BSF ki la ialeh ban peitngor ban pyntikna ban don ka jingshong shngain bad ban nym don kano kano ka jingwan rung beain ki bar jylla ha kane ka ri lyngba na ka thain khappud Dawki-Muktapur.

“Ngi iohi ba ki shipai BSF na ka por sha ka por ki la ioh kem ia ki nong Bangladesh kiba wanrung beain, kynthup ruh ia ki nongtuh barit baria kiba wan tuh dieng bad mar rep ki nongshong shnong ka thain. Hynrei ki bor ka ain ki la trei shitom ban pyntikna ban don ka jingshong shngain ban ai ka jingiada ba pura ia ka jylla,” ong u bah Lahkmen. Halor ka jingker sainar ha katei ka thain, u Bah Lahkmen u la ong ki paidbah ka thain kim pyrshah ïa ka jingker sainar, hynrei ki bynnud ia ka khyndew ba ki rep ki riang lada ker naduh 150 Yard.

” Ki paidbah kim pyrshah ia ka jingker sainar hynrei ki sngewkhia ba lada ka jingker sainar la leh naduh 150 Yard, kan buh jingeh ia ki paidbah ban rep ban riang ha katei ka jaka,” ong u bah Lahkmen.