Ki shipai BSF kin Peitngor bha ha ki jaka bym pat ker sainar ha khappud

U MLA ka Mawsynram constituency u Bah Olan Sing Suin ula ong ba ka thain Mawsynram ka don katto katne ki jaka ki bym pat ker sainar shah kiba buh jingma na ka jingwan buhai shnong ki briew na Bangladesh. Ki katto katne ki jaka ki bym pat ker sainar shah ki kynthup ki bynta ka Wah Umngi, Dolai Naia bad ka wah Khasi Mari.Haba kren shaki lad pathai khubor u Bah Olan ula pynthikna ba ki shipai iada khappud Border Security Force (BSF) ki long kiba peitngor man ka por ha kine ki thain ban tehlakam iaka jingthmu ki nong Bangladesh ban jam sha shilliang pud.

“Ym tang ma nga kum u MLA hynrei wat ki shipai BSF ruh ki sngewkhia na ka bynta ka bit ka biang bad ka jingshngain jong ki paidbah kiba sah ha ki jaka khappud” la ong u Olan.U MLA ka Mawsynram ula ong ba dang shen u la shim bynta haka jingïalang bad u IGP BSF bad ha ka jingïalang u IGP u la pyntip ba u la bthah ia baroh ki Commander BSF Outpost ba kin long kiba husiar ha ki jaka khappud.

“Ryngkat bad u MLA ka Ranikor constituency ngi la ïakynduh ïa u IGP jong ki BSF bad ngi la ïakren bniah bad ki pyntip ïa ngi ïa ka jinglong jingman namar ba ka Bangladesh ka don hapoh ka jingsynshar President Rule bad ka don katto katne ka jingthmu na ki briew ka Bangladesh na ka bynta ka jingshngaiñ jong ki ban wan sha ka jaka jong ka ri India” u la ong.“Ngi la bishar bniah ia ka jinglong jingman bad ka jinglong jingman ka long kaba thikna kumta nga kwah ba ki BSF bad ki paidbah trai shnong kin iatreilang ha kane ka jingpeit bniah ia ka jingwan rung tuh bad ki BSF ki don ha ka kam bad ki iatreilang, haduh mynta ngim pat ioh ia kum kane ka jingjia” u la bynrap.