Kiar na u drok, shongkha khynnah bad synniang ia ka bha ka miat ka imlang sahlang: Kyntu u W.Shylla

U Wailadmiki Shylla myntri ka tnat ka koit ka khiah bad sports & youth affairs ka sorkar Jylla haba don bynta kum u kongsan haka dorbar pyllun ka Kur Shylla kaba la long haka sngi saitjaiñ 24 tarik ha shnong Mukhla West Jaiñtia Hills District, u pynpaw ka jingsngewkmen ban iohi halor ka jingnangkiew ki para kur jong u haki liang baroh.Haba ai jingmut iaka sengkur bad iaki para kur ba kin iaid shakhmat haki kam ba bha, ula pynkynmaw ruh iaka jinglong jingim lade, ba na u khunswet, sha uba pep noh iaka jingpule doctor, naka jingtrei bylla shaka kam MLA bad ruh kum u Myntri sorkar mynta.Nangta haba u pynsngew iaka jinglong la  kloi jong u ban synniang jingiarap la haka kur ne kino kino ki bynta kam mut ba u riewspah hynrei dei ka jingbym lahklet jong u ialade kumno u long 10 snem mynshwa daka jingkyrkhu u Blei.

U ong ba ka jingdon bynta jong u ban synniang haka imlang sahlang kam dei tang hadien ba ula long MLA hynrei naduh ba u dang trei bylla ruh u ialeh ban pyllang khyndiat na kaba u ioh ban iarap iaki kam haka imlang sahlang katkum ka bor jinglah jong u.Kumta u kyntu ia baroh kiba donlang lada riewspah ne duk ruh dei ban synniang ban ai jingiarap haki kam imlang sahlang katkum ka bor jinglah. Ha kajuh ka por ula bynniaw halor ka jingkiew kiba dih drugs, ka jingbun ki longkmie ba shah ieh lok, nangta ka shongkha khynnah hapoh 18 snem.Halor kane u ong la dei ka por ban shong pyrkhat, bad u kyntu ruh iaki kmie ki kpa ba kin pynlut por bad ki khun haiing naka bynta ban iakren khana, ym ban shah shynshar haki mobile phone, khnang ba ki khun kin lait naki jingsniew ba bunjait.

Ha kane ka sngi la ioh ruh ka jingkren na ka kong Joplin Shylla Secretary kur Shylla East Khasi Hills, na u Pyrkhat Shylla President ka Kur Shylla bad kiwei. Nangta kum ka dak ban ai mynsiem iaki khun ka kur la pynkup burom ruh ia kiba poi shakhmat haka pule puthi bad kiwei ki kam, bad la ioh ruh ka jingkren na kiba shah pynkup burom.