Kiba leh bakla kin shah pynngat kyndon ain

Ka Myntri ka tnat ka koit ka khiah ka Kong Ampareen Lyngdoh ka ban jur ba ka Sorkar kam kwah ban don kum kine ki jingjia ba sngewsih ia ki paidbah khamtam ia ki longkmie ba armet. Ia kane ka Kong Ampareen ka la kren halor ka jingkhlad noh ka longkmie ba armet naka shnong Jalaphet East Jaintia Hills haka por ba kala leit phah sumar ha MCH Panaliar Jowai West Jaintia Hills haka 2 tarik Jylliew. Haba kren sha ki lad pathai khubor ka Kong Ampareen ka la pynpaw ia ka jingsngewsih bad sngewkthang mynsiem bad ka la pyntip ruh ba na ka liang ka Tnat kala thaw Committee ban aiti ia ka kaiphod sha ka Meghalaya High Court bad shaka Meghalaya Human Right Commission (MHRC).

Ka Myntri ka la iathuh ba na ka liang ki ba haiing ka lanot ki la ujor shaka Meghalaya High Court halor ka jingkhlad noh ka longkmie bad i khunlung bad na ka liang ka Meghalaya Human Right Commission (MHRC) ruh ka la shim hi ia kane ka kam bad ka la bthah ia ka Sorkar ban aiti ia ka kaiphod. “Ngim lah ban shu ia khana kumne halor kato ka jingjia ba sngewsih. Ngim kwah ban kynnoh mano ba bakla, kumno bakla, ngin ap iaki kaiphod bad lada don kano kano ka jingbakla ka Committee kan sa pyni ia kita bad ngi ruh ngin hap ban shim ia kano kano ka Displinary Action lada lap ba don kum kata ka jingbakla” la ong ka Kong Ampareen.

Ka Myntri kala ong ba haduh mynta ka tnat kam lah ban shim ia kino kino ki sienjam namar kiba haiing kila leit sha Court. “Lada don ka jingbakla, kiba leh bakla ki hap hi ban bah khlieh hynrei namar ba ngim pat ioh ia ki kaiphod, ngam pat lah ban ong eiei halor kane” kala ong.