Kin don ha EWKHD 8 sngi, ïakynduh ban ai jingmut kumno ban pynkhlaiñ Party

U Danish Abrar uba la shah thung kum u observer jong ka jylla Meghalaya naka bynta ka prokram ‘ka jingpynthymmai ïa ka seng’ ïa kaba la tip ruh kum ka ‘Sangathan Srijan Abhiyan’ lane ka ‘Organisational Revitalisation Drive’, u la wan poi ha Mairang bad ban sah ha Eastern West Khasi Hills District kumba shi taiew tam ban ïa kynduh ïa ki nongïalam jong ka seng Congress, ïa ki kynhun bapher bapher, ïa ki nongshong dukan bad ïa ki paidbah nongshong shnong, ban twad jingmut shaphang ka seng congress bad ban ïaphylliew jingmut kumno ban pynthymmai ïa ka seng Congress hapoh ka jylla Meghalaya bad ban ïoh sngew naki paidbah uei uba biang ban long u nongïalam hapoh ka District.
Haba ïakren bad ki nongthoh khubor jong ka district, u Abrar ula pynpaw ïaka sngewdiaw halor ka jingshet kylla ki MLA na Meghalaya kaba ki paidbah kila jied ïaka seng Congress bad pynjop ïaki hynrei kila phet noh sha kiwei pat ki party ynda kila jop tang naka bynta ka jingmyntoi shimet jong ki.
U bah Alexander kharsyntiew, u president ka District Congress Committee ka Eastern West Khasi Hills District u la pynpaw ba ka jingtlot ka seng ka congress ka dei naka sainpyrkhat kaba kum ka jaitbynriew ka ju don naduh ki MLA haduh ki paidbah bad kata ka long ba ki ïabeh ban don haka seng kaba ïalam ïaka sorkar bad lada ka seng kaba ki don ne ki kyrshan ka don haka liang pyrshah ki sngew ba kam don jingmut ïa ki.
U bah Kyrsyntiew ula ïathuh ruh ba u Danish Abrar ha ryngkat ki observer naka MPCC kiba kynthup ïa u bah Eric C Kharsyntiew bad u bah Nobert Jana kin don ha Eastern West Khasi Hills District kumba phra sngi ban leit sha ki zone bapher bapher kiba don hapoh ka District bad ula kyntu ïa ki paidbah ban mih shakhmat ban ïa kynduh ïa ki nongïalam jong ka seng ha kine ki phra sngi ban ai jingmut lem kumno ban pynkhlaiñ biang ïa ka seng congress.