klur mang ka sorkar ia ka South Garo Hills

U Myntri Rangbah ka Jylla u Conrad K Sangma ula iashim bynta ha ka jingrakhe ia ka 33rd Foundation Day jong ka South Garo Hills District ha ka jingiadonlang ki Myntri Sorkar ba kynthup ia u A.T Mondal, Bah Shakliar Warjri, Marcuise Marak bad u Rakkam A Sangma, ki MLA kiba kynthup ia u Sanjay Sangma, Kartus Marak bad Sengchim Sangma bad u CEM ka GHADC u Albinus Marak bad kiwei kiwei. U Conrad Sangma ula pyllait paidbah ia ka Meghalaya Economic Inclusive Program (M-EIP) bad CM Fellowship bad ula aiti ia ki ‘Cheque’ sha ki nongioh jingmyntoi hapoh jong ka MegCARE bad ula buh ia u mawnongrim na ka bynta ban tei ia ka Synthetic Athletic Track bad ia ka Building bathymmai jong ka Captain Williamson Government Higher Secondary School. Nalor kane ula aiti ruh ia ki syrnod sha ki skul bad ki khynnah skul kiba la lehbha ha ka eksamin HSSLC bad SSLC kaba dang shu dep. Haba kren ha ka jingialang u Conrad Sangma ula ong naduh u snem 2018, ki project kiba shongdor T.1400 Klur la pyntreikam ha katei ka thain bad yn sa bhah T.400 Klur lyngba ki scheme bapher bapher ha kine ki 2-3 snem ki ban wan.

Ula ong, ba ka sorkar ka la phai khmat bha na ka bynta ban kyntiew ia ka roi ka par bad ia ka ioh ka kot ha ka thain bad ka South Garo Hills suki ka la sdang kylla, lyngba ki lad bad ki kabu kiba bun, kiba la thaw na ka bynta ki trai shnong. U Myntri Rangbah ula ong, haba ka jylla ka la iaid shakhmat ban pynkhreh ban kynjoh 60 snem ia ka jingioh ia la ka jong ka jylla, ka thong ka long ban pynthikna ba kan don ka roi ka par kaba kyllum ia baroh, kumta baroh ki district ki dei ban buh ia la ki jingthmu ban pynleit jingmut halor ki sienjam ki bapher bapher haba ka Meghalaya ka rakhe ia ka jingdap 60 snem ia ka jingioh ia ka jylla bad kadei ban don ka daw na ka bynta iwei pa iwei ban rakhe bad ban sngewsarong kum ki nong Meghalaya.  “Lada ngi hap ban wanrah ia ka jingkylla ia ka Meghalaya, ka sorkar marwei kan ym lah ban leh ban pynkylla, hynrei man la ki nongshong shnong ki hap ban ia trei da ka mynsiem jong ka jingshim khia lang” ong u Conrad.

Ula kyntu ia ki trai shnong ba ki dei ban iada ia ki khlaw ki btap, ki wah bad pynpaw ia ka jingriewspah jong katei ka thain ha ka jingdon ia ka mei mariang bad kane ka dei ka lad ka ban khring bha ia ki kompani ban pynduna ia ka jingpynmih ia ka Carbon. Ha kane ka jingialang la ioh ruh ia ka jingkren na u Rakkam A Sangma, u Bah Shakliar Warjri, u Ham Haverkort, Partnership Lead Asia, Rabobank Acorn. Ha ka jingleit jngoh ia ka Baghmara, u Myntri Rangbah ula plie ia ka Prime Hub kaba dang shu dep ban tei thymmai bad ula leit ruh ban jngoh ia ka Baghmara Police Station ia kaba la dep ban shna pynbha bad pynitynnad lyngba ka Police Infrastructure Development Fund.