Klur yn theh ka sorkar ban kyntiew ia ka kam ialehkai ha ka jylla

U Myntri Rangbah u ba dei khmih ruh ia ka pla tyngka ka sorkar jylla, u Conrad k Sangma, haba wnrah ia ka mang tyngka ha ka iing dorbar mynta ka sngi, u la pyntip ba ha kine ki lai snem ki ban wan, ka sorkar ka thmu ba kan pynlut ym duna ia ka T.1,900 Klur tyngka, bad kane kan kynthup lang ia ka jingpynlut haba iadei bad ka jingpynkhreh ban pynlong ia ka lympung bah National Games 39, ka ban long hangne hapoh ka jylla. Haba wanrah ia kane ka mang tyngka, na ka liang u Conrad u kam ba naduh u snem 2018, kumba T.1,500 Klur na ka pla tyngka jong ka jylla (state fund) la lah ha ka ban pynlut ha ka ban tei ia ki jaka ialehkai, kaba long tang kumba T.100 Klur naduh u snem 2001-18. Shuh shuh haba wanrah ia kane ka mang tyngka, na ka liang u Myntri Rangbah, u pynpaw ba ka sorkar ka la lah ha kaban pynlong ym duna ia 10 tylli ki lympung bah ialehkai (international sports events) kynthup ka Indian Super League, Durand Cup, Elite Men’sBoxing Championship, ka ICF World Cup Qualifiers ia ka India.
Nalor katta u Conrad um lah ruh ban khlem da pynpaw ia ka jingsngew sarong, ba ha ka 38th National Games kaba dang shu dep, kum ka jylla ka la lah ba kan thaw ia la ka rekod hadien ba ka la ioh ba kan khur haduh 5 tylli ki takma. Haba phai sha ka lympung ialehkai jong ka 39th National Games ban long ha u snem 2027, u Conrad u la kam ba ka long ka burom kaba khraw ban ioh ban pynlong ia kane ka lympung kaba la wan hadien ka jingiatan tyllai kaba jur bad ba shyrkhei bha bad kiwei pat ki jylla kum ka Chhattisgarh bad Assam. Katto katne ki pasoh jong ka mang tyngka haba iadei bad ka sports ka long ka jingthmu ban pynlut haduh T.732 Klur na bynta ka Mawkhanu Football Complex, ka ban ngiam kumba 40 hajar ngut ki nongpeitkai. Sa kumba 25 tylli ki madan artificial turf bad 140 tylli ki grassroot center bad ka jingbhah pisa ba kyrpang ia ki klob ialehkai, kin long ki kam kiba ka sorkar ka la buh ia katta ka thong ha kane ka kynti kaba mynta, khlem da klet ba kan don ruh ka jingbhah kaba T.10 Klur na ka bynta ka CM’s Football Mission.
Shuh shuh ha kane kamang tyngka, ka sorkar jylla kan bteng ia ka bhah pisa kaba kynjoh sha ka T.236 Klur ba kan lah ha kaban pyndep ia ka jingtei ia ka J.N. Stadium, P.A. Sangma Sports Complex, Ampati Stadium bad Jongksha Indoor Stadium, ia kaba yn bynrap lang ruh bad sa kiwei kiwei pat ki jingtei ba thymmai na ka bynta u snem 2025-26.U Conrad u lapyntip ba dang shen, ka sorkar jylla ka la rai ba kan pyntreikam ia ka Meghalaya Outstanding Sports persons Direct Appointment Policy, kaba mut ka lad ban aikam aijam ia ki khun samla ka jylla, kiba ioh ban khur ia la ki takma ki jong ki na ki rynsan ne lympung bah ialehkai ba ithuh bad pdiang ia ka da ka International Olympic Committee (IOC).