Kmen u MLA Jowai, ba ieng ka building Mini Secretariat

U Wailadmiki Shylla MLA 2-Jowai Constituency uba dei ruh u chairman ka MUDA haba leit buddien halor ka jingpyntrei iaka Mini Secretariat hynne ka sngi kaba la shna ha phyllaw ka tnat PWD ha Jowai, u dap daka jingsngewkmen ban iohi ba ka jingpyntrei la dep kumba 85%. Ia kane ka Mini Secretariat la wan ban plie maw nongrim ha u bnai December 2022 da u mytri ryngbah duh ka sorkar Jylla u Conrad K. Sangma. Bad ha kane ka sngi ba leit jurip leit buddien u MLA la donlang ruh ki ophisar ka tnat PWD bad u Contractor. U Wailadmiki Shylla haba kren u ong, kum u MLA hi u kwah ba kano kano ka kam bala sdang, u kwah ruh ban iohi iaka jingdep katkum ka por bala buh khnang ba kan long ka jingkyrkhu iaki paidbah ba pyndonkam. 

Kumba long mynta ka jingtrei bala dep dei 85% katba 15% pat kiba dang sah dei ki jyrwit jyrwat bad ban pynbha pynjanai kaba kham shim hi, kynthup naka bynta ban pynbiang bording, ka um, ban biah rong, ban shna iaki sawdong sawkun bad kiwei. U pyntip ruh ba ha kane ka Mini Secretariat don 3 tylli ki Block iaka rukom pyntrei ruh la bhah la ka jong ka bynta. Kane ka building bala ieng mynta dei ka West Block, kiba sah ba yn sa khot pyntrei pat dei ka East Block bad North Block.   Ia kane ka West Block la mang haka jinglut ba 20 klur, katba naka bynta ka East Block bad ka North Block pat kaba yn sa khot pyntrei la mang kumba 29 klur.

Ha ka jingiadei bad kitei ki artylli ki block u iathuh ba naka liang jong u ula dep pynkynmaw ruh shaka sorkar bad wat hapoh assembly dang shen ruh ula dep pynkynmaw ia u myntri ryngbah duh da kaba khmih lynti ruh ba yn sa ioh hi. Ula bynrap ruh ba ka jinglah ban pyndep shwa ia kane ka West Block ruh kan long ka jingkyrkhu bakhraw ban pynsting pynkylluid iaka DC ophis da kaba lah ban kynriah katto katne tylli ki tnat treikam.