Kop u bah Prestone tang kane ka sorkar ba nud tyrwa siew tulop nongtrei District Council

U Symbud Myntri Rangbah ka jylla u bah Prestone Tynsong ula ong ba ka sorkar jylla kam don kano kano ka jingthmu ban pynkhein ne ban tuklar ia ka bor jong ka District Council. Haba pynshai ia ka mat ba la wanrah da u MLA ka VPP na Nongkrem u bah Ardent Miller Basaiawmoit hynne ka sngi ha Iing Dorbar Thawain ka jylla, u Symbud Myntri Rangbah uba dei ruh u Myntri ka tnad District Council Affairs (DCA) ula ong ba ka sorkar ka la thaw da ka State Committee khnang ba kin iakren bad iaphylliew jingmut bad ki Council, la ki pdiang ne em ia ka jingtyrwa ka sorkar ba kan siew ia ka tulop jong ki nongtrei ka District Council. U bah Prestone ula ong ba kane ka Committee ba la thaw ka sorkar ka long ruh na bynta ba kin iaphylliew jingmut bad baroh lai tylli ki ADC khnang ban pynthymmai ia ki rukom treikam da kaba thung ruh ia ki ophisar IAS ne MCS.

“Hadien ba kane ka Committee ka la dep ban iasyllok ban iaphylliew jingmut bad baroh lai tylli ki ADC, kin sa aiti ia ka kaiphod sha ka sorkar hapoh 45 sngi,” ong u bah Prestone bad ula bynrap kane ka pyni ruh ba ka sorkar kam don kino kino ki kam barieh kumba la kynthoh da u bah Ardent. U Symbud Myntri Rangbah ula ong ba dei tang kane ka sorkar kaba nud ban shim ia ka sienjam ban tyrwa ban siew tulop hi sha ki nongtrei ka ADC ha kaba ym pat ju don kano kano ka sorkar kaban nud ban shim ia kum kane ka sienjam. “Watla ka sorkar ka don jingeh ha ka pla tyngka, hynrei haba peit ia ki jingeh jong ki nongtrei ka Council, ka sorkar ka la hap ban tuklar ban iaphylliew jingmut ban weng ia kine ki jingeh ka Council,” ula ong. Shuh shuh u Symbud Myntri Rangbah ula pyntip ba katkum ka jingkhein ka JHADC ha ka shi snem ka pynmih pisa kumba T.68.98 klur kynthup na ki marpoh khyndew bad kali katba ka jingduna ka long T.102 klur tang ban siew tulop. Ha GHADC ka jingmih ka long T.14.15 klur katba ka jingpyllut tang ha ban siew tulop ka long haduh T.84 klur. Katba ha KHADC ka jingmih ka long T.46.11 klur katba ka jingpyllut ban siew tang ka tulop ka long T.72 klur.

Ula ong, “Hadien ba ka sorkar ka la iohi ia kine ki jingduna ha ki Council, ka la sngew dei ban shim noh da ka sienjam ba khraw ban pynbeit thymmai ia kitei ki jingeh ka Council.”Haba iadei bad ka jingkynthoh u bah Ardent ba ka sorkar kam pyllait ia ka bhah jong ki District Council, u Symbud Myntri Rangbah ula pynshai ba ka sorkar ka dang pynkhreh ban pyllait ia ka bhah kaba kumba T.60 ne T.70 klur bad shen ka sorkar kan sa pyllait noh. Na ka liang u Bah Ardent ula kyntu ia ka sorkar jylla ba lada ka sngewkhia shisha ia ka Council ka dei ban kan kyntiew ia ka mang tyngka ki ADC  bad ka dei ban ailad ban treikam laitluid khlem da don jingtuklar na ka sorkar jylla. U bah Ardent ula bynrap ruh ba lada ka sorkar ka sngewkhia ia ka jinglong jingman ka Council,  ka sorkar kam dei ban don ka jingartatien ban thung da ka jingtohkit ban lap ia ka daw tynrai halor ka jingtlot  ka rukom treikam ki Council.