Kthong ka HYC ïa uba ïuh ïa u Heprit haduh da ïohna Police Check Point

Ki dkhot bad nongialam ka Hynniewtrep Youths’ Council (HYC) Umlieh Unit, kaba hap hapoh Nongstoiñ Circle, West Khasi Hills District, mynta ka step Saitjain ha  ryngkat ki dkhot jong ka HYC Nongkasen Unit ki la.kthong ia uwei u nongniah kali pickup uba sei u bar jylla, uba niah ia ka kali kaba don ia u Registration No.AS-03CC-3644, kaba la rat bad tylliat ia u Heprit Newbornson Syiemlieh, uba dang 5 snem rta, na ka shnong Tiehsaw Khyllem ha ka por 8:20 AM eiei. Hadien kane ka jingjia, ki dkhot ka HYC ki la pyntip sha ki nongialam ka HYC West Khasi Hills District bad la phah ban ap kylleng ki jaka.

Hynrei da ka jingtrei shitom jong ki dkhot ka HYC Umlieh Unit, la leit ban beh haduh ba u nongniah u la phet rieh noh ha Police Check Point ha Tiehsaw Khyllem. Na ka liang ki kmie ki kpa ryngkat kiba ha iing hasem ki la pynkit noh mar mar ia u Heprit sha Markasa PHC, hynrei namar ka jingjur palat ka mynsaw, la pynkit noh mar mar ia u sha NEIGRIHMS Hospital, Shillong. Na ka liang ka seng HYC, lyngba u Samla Sevenson Pariong, President HYC Umlieh Unit, ka la pynrem jur ia kane ka jingpynher stet jong utei u bar jylla ia katei ka kali khlem map shuh ia ki khyllung khynnah. Hooid kum ki briew ngim lah ban biang hynrei haba ki phet khlem kren lane iarap, ka pynpaw ba kim dei kiba bha.

Ka seng khaduh ka kitbok kit rwiang ia u Heprit Newbornson ba un jem noh lyngba ki jingsumar bad ka seng ka maham ruh ia ki nongniah kali ba kim dei ban pynher stet ha ki jaka ba don shnong bad ka seng kan iai peitngor man ka por halor kane.Nalor kata, ka HYC ka dawa ruh na ka Police Department ba kan pynshitom tyngeh ia utei u  Barjylla bad ban phah siew ruh ia ki bai kut ksain na ka bynta u Heprit Newbornson.